2 bata sugatan sa boga
ZAMBOANGA CITY – Nilalapatan ng lunas sa isang ospital sa Pagadian City ang magkapatid na dalawang bata matapos tamaan ng ligaw na bala sa pamamaril ng hindi nakikilalang mga suspek sa Purok Kapalaran, Barangay District.
Batay sa ulat ng Pagadian City police station, dakong 8 p.m. habang naghihintay ng masasakyang tricycle ang magkapatid na biktima kasama ang kanilang mga magulang nang biglang lumitaw ang nasa tatlong hindi nakilalang mga suspek at biglang binaril ang isang lalaki na kinilalang si Pakoy Glimada ngunit nakatakbo kaya hindi natamaan ng bala.
Kahit tumatakbo na si Glimada ay patuloy siyang binabaril ng mga suspek kaya minalas na tinamaan ang dalawang bata na noon ay nakatayo sa gilid ng kalsada.
Lumalabas sa imbestigasyon ng pulisya, isang araw bago nangyari ang pamamaril, nakipagsuntukan si Glimada sa nakaaway niyang grupo na pinaniniwalaang may kagagawan sa nasabing insidente.
