HATAW! D'yaryo ng Bayan hatawtabloid.com
UPANG matugunan ang mahigpit na pangangailangan sa paggawa ng isang Comprehensive Provincial Infrastructure Master Plan (CPIMP) sa Bulacan, inilabas ni Gob. Daniel Fernando ang Executive Order No. 22, series of 2025, na nagbibigay ng direktiba sa pagbuo ng Provincial Infrastructure Coordinating Council (PICC).
Binigyang-diin ng gobernador ang kritikal na pakikiisa ng lahat ng lokal na pamahalaan, mula barangay hanggang mga ahensya ng pamahalaang nasyunal, sa pagkamit ng isang nagkakaisa at malinaw na infrastructure planning process.
“Bulacan cannot afford questionable infrastructure projects. Sa pamamagitan nito, sisiguraduhin natin na bawat proyektong pang-imprastraktura sa lalawigan ay grounded on real needs, validated data, at fully transparent because the Bulakenyos deserve visible, functional, and accountable projects,” ani Fernando.
Ayon sa EO, bawat barangay sa Bulacan ay kailangang maghanda o i-update ang kanilang Barangay Infrastructure Master Plan, na sinasakop ang drainage, flood control, mga kalsada, at isumite ito sa kanilang lungsod o bayan.
Bilang tugon, ang mga City o Municipality Planning and Development Office at Engineering Office ang magre-review, magsasama-sama, at magbubuo ng mga isinumite ng mga barangay upang maging City/Municipality Infrastructure Master Plan.
Sa huli, ang Provincial Planning and Development Office ng Pamahalaang Panlalawigan ng Bulacan, na magsisilbing kalihiman ng PICC, ang magsasama-sama ng lahat ng isinumiteng plano upang makabuo ng CPIMP ng Lalawigan ng Bulacan.
Sa oras na maaprubahan ito, ang CPIMP ang magsisilbing opisyal na reperensiyang dokumento sa pagpa-plano, pagba-badyet, at pagpapatupad ng lahat ng proyektong pang-imprastraktura sa lalawigan, at isasama sa Provincial Development and Physical Framework Plan (PDPFP).
Nagbibigay direktiba rin ang EO 22 sa lahat ng ahensya ng pamahalaang nasyunal at kanilang mga contractor na magpapatupad o maghahain ng mga proyekto sa bisinidad ng lalawigan na makipag-ugnayan sa PICC bago ang implementasyon, at magbigay sipi sa konseho ng project profiles, detalyadong plano, at timeline upang masiguro ang pagkakatugma sa CPIMP at upang maiwasan ang pagkadoble o pagkasira ng kalikasan.
Ang PICC ay binubuo ng gobernador bilang chairperson; Department of the Interior and Local Government Bulacan provincial director bilang vice chairperson; at ang panlalawigang tagapangasiwa, panlalawigang ingat-yaman; panlalawigang legal officer, panlalawigang agriculture officer, Bulacan Environment and Natural Resources Officer, mga district engineer ng Department of Public Works and Highways sa Lalawigan ng Bulacan, pinuno ng Provincial Engineering Office, mga pinuno ng lokal na pamahalaan at kanilang kani-kaniyang municipal o city engineers, at dalawang kinatawan mula sa accredited na Civil Society Organization bilang mga miyembro. (MICKA BAUTISTA)
