HATAW! D'yaryo ng Bayan hatawtabloid.com
MALAYBALAY, Bukidnon — Natupad na ang layunin ng Philippine Sports Commission (PSC) na magtatag ng isang rehiyonal na training center para sa mga pambansang boksingero.
Sa isang makasaysayang hakbang, lumagda sa isang Memorandum of Agreement (MOA) ang PSC at ang Pamahalaang Panlalawigan ng Bukidnon upang italaga ang Bukidnon Sports and Cultural Complex sa Malaybalay bilang pangunahing lugar ng pagsasanay ng mga piling boksingerong Pilipino sa Mindanao.
Taglay ng naturang pasilidad ang mga world-class na kagamitan tulad ng track and field oval, football field, Olympic-size swimming at diving pools, at isang 3,000-seater indoor gymnasium para sa basketball, badminton, at martial arts.
Ito na ngayon ang magiging bagong tahanan ng Philippine National Boxing Team, ang unang pambansang koponan na magsasanay sa naturang pasilidad.
“Lubos akong natutuwa na mabuksan ang pasilidad na ito dahil ito ang tamang hakbang para sa Philippine sports—at lahat ng ito ay magsisimula dito sa Bukidnon,”
pahayag ni PSC Chairman Patrick “Pato” Gregorio sa ginanap na seremonyal na paglagda nitong Miyerkules, kasama sina Bukidnon Governor Rogelio Neil Roque at Senate Majority Leader Juan Miguel Zubiri.
Si Zubiri, na ipinagmamalaki bilang anak ng Bukidnon at pangunahing tagapagtaguyod ng inisyatiba, ay binigyang-diin ang mas malawak na pananaw:
“Isipin ninyo kung magtatayo tayo ng mga regional center sa Luzon, Visayas, at Mindanao — maaakit natin ang pinakamahusay sa pinakamahusay.”
Ipinapakita ng nasabing kasunduan ang pinagsamang layunin ng PSC at lokal na pamahalaan na paigtingin ang sports development sa mga rehiyon at matuklasan ang mga lokal na talento.
“Hindi optimal na ang batang atleta ay aalisin mo sa kanilang tahanan para mag-train sa isang lugar na hindi nila bayan,”
ayon kay Marcus Manalo, Secretary General ng Association of Boxing Alliances in the Philippines (ABAP).
“Plano rin naming gawin itong training center para sa lahat ng antas — hindi lang para sa elite kundi pati para sa mga recreational athletes sa pamamagitan ng ‘Sports Boxing for All’ program,”
dagdag pa ni Manalo.
Pagkatapos ng boxing team, inaasahan ding gagamit ng pasilidad ang iba pang national sports federations tulad ng Pilipinas Sepak Takraw Association Inc., Karate Pilipinas Sports Federation Inc., at PhilCycling.
Dumalo rin sa paglagda ng MOA sina Karate Pilipinas president Ricky Lim, Pilipinas Sepak Takraw president Karen Caballero, Philippine Amateur Baseball Association deputy secretary general at dating UP College of Human Kinetics Dean Francis Diaz, PSC Chief of Staff Prof. Loujaye Sonido, at kinatawan ng PhilCycling.
Pinangunahan din ni Zubiri si Gregorio sa paglibot sa malawak na pasilidad na may 15,000-seater stadium, eight-lane track, football field, at aquatics center.
Kasama sa mga planong proyekto sa hinaharap ang apat na tennis courts, softball/baseball diamond, open field para sa mga outdoor event, auditorium para sa mga pagtatanghal, at museum.
Sa pagtatalaga ng Bukidnon bilang pambansang sports hub, ang inisyatibong ito ng PSC ay isang malaking hakbang tungo sa inklusibo at grassroots-driven na pagpapaunlad ng mga atleta. (PSC MCO/HNT)
