HATAW! D'yaryo ng Bayan hatawtabloid.com
NAG-ALOK ng halagang P1 milyon ang Ang Bumbero ng PIlipinas (ABP) Partylist sa makapagbibigay ng impormasyon ukol sa utak ng pagpatay kay Chairman Lenin Bacud, 3rd nominee ng partido.
Ayon kay Dr. Jose Antonio “Ka Pep” Ejercito Goitia himihingi sila ng katarungan sa sinapit ng kanilang kasama na siyang tunay na founder ng partido at tunay na isang bombero.
Hindi naitago ng grupo ang pagkondena sa itinuturing nilang walang katarungang pagpaslang kay Bacud.
Inamin ni Goita na nakatatanggap ng mga banta sa buhay si Bacud ngunit binabalewala nito sa hangaring makapaglingkod sa bayan.
Bagama’t hindi tuwirang tinutukoy na suspek ang kalaban ni Bacud partikular ang mga sinampahan niya ng reklamo sa Korte at sa Commission on Elections (Comelec), ngunit sa sandaling mawala ang nagreklamo ay tiyak na maibabasura ang kasong isinampa.
Umaasa at nagtitiwala si Goitia sa mga awtoridad para sa agarang pagresolba ng kaso.
Bagamat mayroon nang suspect ang mga awtoridad at ang kanilang grupo ay minabuti muna nilang manahimik upang bigyang daan ang imbestigasyon.
Tiniyak ni Goitia na hindi sila titigil hangga’t hindi nakakamit ni Bacud ang hustisya at hindi nahuhuli ang mga sangkot sa krimen upang panagutin. (NIÑO ACLAN)
