2 grade 8 students dedo sa saksak ng 3 menor de edad

HATAW News Team

DALAWANG Grade 8 students ang napaslang sa pananaksak ng tatlong estudyante rin, pawang menor de edad, sa labas ng kanilang paaralan sa Las Piñas City nitong nakaraang Biyernes, 11 Abril.

Kinilala ni P/Col. Sandro Tafalla, Las Piñas City Police chief, ang mga biktimang sina alyas Rye Enzo at alyas Joshua, kapwa 15 anyos, parehong Grade 8 students sa Aguilar High School.

Ayon kay Tafalla, naglalakad ang mga biktima pauwi sa kanilang tahanan sa labas ng eskuwelahan nang atakehin ng mga suspek dakong &:00 pm sa Balikatan St., Barangay CAA, Las Piñas City.

Aniya, si Enzo ay may saksak sa kaliwang bahagi ng leeg, at namatay habang nilalapatan ng lunas sa Las Piñas Doctors Hospital, habang si alyas Joshua ay idineklarang dead on arrival sa Las Piñas General Hospital.

Sa ulat ng pulisya, bago ang insidente, isa sa mga biktima at isang 15-anyos Grade 9 student ay nagkasagutan sa loob ng comfort room ng paaralan.

               Kuwento ng isang saksi, isa sa mga biktima ay pinaglaruang patay-sindi ang ilaw sa comfort room na ikinainis ng Grade 9 student. Kasunod nito nagkaroon ng mainit na pagtatalo ang dalawa.

               Nang pauwi na ang mga biktima, inatake sila ng Grade 9 student at dalawang iba pa — isang Grade 7 student at isang Grade 10 student.

Ayon kay Tafalla, ang mga suspek ay isinuko ng kanilang pamilya sa pulisya. Nabatid na sila ay dadalhin sa Bahay Pag-asa sa Las Piñas City.

               Aniya, ang mga arestadong suspek ay sasampahan ng kasong homicide o murder depende sa resulta ng imbestigasyon.