Bangkay ng scavenger natagpuan sa hukay ng DPWH sa Pasay City

WALANG BUHAY nang matagpuan ang isang lalaki sa isang hukay ng Department of Public Works and Highways (DPWH) na bahagi ng flood control project sa kanto ng Andrews Avenue at Domestic Road sa Pasay City kamakalawa.

Positibong kinilala ang biktima na si Dante Alvarez y Villamor, 50 anyos, kilalang scavenger ngunit walang permanenteng address.

Batay sa inisyal na impormasyon, habang nagsasagawa ng foot patrol ang mga pulis kasama ang barangay tanod nakarinig sila ng pagsabog sa lugar.

Pagdating nila sa lugar para siyasatin ang pagsabog na nagmula sa flood control project ng DPWH napansin nila ang sinunog na mga wire ng koryente.

Natuklasan ang isang katawan ng tao na nakahiga sa isang kanal na puno ng tubig. Hinihinalang nakoryente ang biktima. (NIÑO ACLAN)