HATAW! D'yaryo ng Bayan hatawtabloid.com
MAHIGIT 300 kinatawan mula sa mga pangunahing grupo ng transportasyon—kabilang ang Stop and Go Transport Coalition, Federation of Jeepney Operators and Drivers Association of the Philippines (FEJODAP), Liga ng Transportasyon at Operators sa Pilipinas, Inc. (LTOP, Inc.), at Pasang Masda—ang nagdeklara ng kanilang suporta para sa Ako Ilocano Ako Partylist, sa isang pagtitipon sa Quezon City noong Huwebes.
Inendoso ng mga grupo ang adbokasiya ng partylist para sa kapakanan ng mga driver, na binanggit ang pagtulak nito para sa mga programang pangkabuhayan, patas na regulasyon, at suporta sa gitna ng tumataas na gastos sa gasolina at mga hamon ng PUV modernization.
Pinuri ni LTOP, Inc. President Orlando Marquez ang pagtugon ng grupo, binanggit ang pagpapatuloy nito sa legasiya ni dating Ilocos Sur Gov. Luis “Chavit” Singson, na nag-withdraw ng kanyang 2025 senatorial bid dahil sa mga alalahanin sa kalusugan.
Pinatunayan ni Ako Ilokano Ako Rep. Richelle Singson ang kanilang pangako: “Ipinagpapatuloy namin ang laban ni Daddy sa pamamagitan ng Ako Ilokano Ako—nabubuhay ang kanyang mga plataporma sa pamamagitan ng aming itutulak na batas.”
Nilinaw ni Manong Chavit, sa isang inspirational message, na ang kanyang pag-withdraw ay hindi nangangahulugan ng pag-abandona sa suporta sa sektor ng transportasyon.
Binigyang-diin niya ang kanyang e-jeepney initiative, na ipinangako ang zero-interest loans at pagbabawas ng presyo ng unit sa ₱1.2-M (kompara sa ₱2.5-M-₱3-M sa merkado) para mapagaan ang paglipat ng mga driver sa Public Utility Vehicle Modernization Program.
Ang kaganapan ay nakitaan din ng mga pag-endoso mula sa mga kumakandidato pagka senador — mga kasalukuyang senador Bato dela Rosa at Bong Go, SAGIP Partylist Rep. Rodante Marcoleta, dating presidente ng Senado Tito Sotto, dating senador Ping Lacson, dating DILG secretary Benhur Abalos, dating senador Manny Pacquiao, at Willie Revillame, na nagpapatibay sa kampanya ng Ako Ilokano Ako partylist sa eleksiyon sa Mayo 2025.
Ang Ako Ilocano Ako partylist, habang nakaugat sa adbokasiya ng Ilocos, ay naglalayon na palawakin ang pambansang impluwensiya nito sa pamamagitan ng mga inisyatiba ng grassroots at transport sector.
