Sugar itinanggi relasyon kay Willie

SHOWBIZ KONEK
ni Maricris Valdez Nicasio

SUPER tanggi si Sugar Mercado sa kumakalat na tsismis sa kanila ni Willie Revillame. Loveless at wala raw siyang panahon sa pag-ibig. 

Ito ang nilinaw sa amin ni Sugar nang makausap sa contract signing ng bago niyang endorsement, ang Melona Beauty Drinks na pag-aari nina Dr. RJ Evangelista at Charles Arriza ng Horizons Health and Beauty Products Corp.. na ginanap ang pirmahan kamakailan sa Kamagong Function Room ng Dusit Thani Hotel.

Giit ni Sugar, “Wala talaga. Parang ‘yung oras ko, ibigay ko na lang sa importante like una sa anak ko.

“Napakarami kong tinutulungan para maisingit ko siya sa bahagi ng buhay ko. If ever, in time, kung parang gusto ko ng pahinga, kung ibibigay ni Lord, okay ako. Pero kung wala, okay ako. Okay ako ng wala (lovelife), okay ako ng mayroon. Pero ngayon, choice kong anak ko lang,” paglilinaw ni Sugar na aliw kausap.

Nang usisaian namin kung paano nag-umpisang iniugnay siya kay Willie, sinabi nitong hindi rin niya alam kung saan nanggaling.

Pakiusap nga ni Sugar, huwag nang palakihin pa.

“Basta ok po kami, ‘wag na lang palakihin, basta we’re okay ni Kuya Wil,” ani Sugar na naging co-host ni Willie noon sa show nitong Wowowin.

At dahil maraming bagong co-host si Willie na magaganda at sexy,  natanong namin si Sugar kung willing pa ba siyang makatrabaho muli si Kuya Wil.

Sagot ni Sugar, hindi na niya kayang magampanan pa ulit na maging co-host. Depensa kasi niya, “Kasi si Kuya Wil, napaka-perfectionist sa trabaho. Saludo ako sa kanya roon. 

“Lahat ng issue sa kanya about that, alam ng mga nagtatrabaho sa kanilang kaya siya yumaman kasi ganoon  siya magtrabaho talaga.

“Wala sa kanya ‘yung kahit na ano ka pa niya, kamag-anak ka niya o anak ka niya, gusto niya, pulido ‘yung trabaho.

“And hindi ko na kayang ibigay ‘yun. Kasi may anak na ako. Kailangan kong mag-focus talaga sa business ko.

“Kasi ‘yun ‘yung kailangan ng mga anak ko. Basta ako, kung ano ‘yung ikabubuti ng anak ko, roon ako,”wika ni Sugar.

Okey naman si Sugar sakaling kunin siya sa ibang noontime show. Basta hindi iyong makukuha ang lahat ng oras niya na para rin sa kanyang mga anak.

Ukol naman sa bagong endorsement, masaya si Sugar lalo’t nagustuhan niya ang produkto.

Aniya, bago siya umoo sa Melona ay ginamit muna niya ito ng ilang buwan para makita kung talagang effective. Nakita naman niya na maganda ang naidulot sa kanyang  katawan, kaya napa-oo siya kina Doc RJ at Charles.

Super proud si Sugar sa kanyang produktong ineendoso dahil nakatutulong ito para lalo pang gumanda at mapanatili ang kanyang kabataan.

Kasabay ni Sugar na pumirma ng kontrata bilang endorser ang Viva artist na si Kyle Villanueva.