HATAW! D'yaryo ng Bayan hatawtabloid.com
POSIBLENG hindi na matupad ang pangarap na maging alagad ng batas ang isang police trainee matapos umastang parak at mahulihan ng baril sa loob ng Camp Karingal sa Quezon City nitong Sabado ng gabi.
Kinilala ang police trainee na si Roly Vincente Dimla Manalastas, 30, residente sa NBBS Kaunlaran, Navotas City.
Sa report ng Quezon City Police District-Criminal Investigation and Detection Unit (QCPD-CIDU) nadiskubre ang dalang baril ni Manalastas dakong 8:10 pm sa QCPD Grandstand sa loob ng kampo.
Nagsasagawa ng physical accounting ng mga trainee sa QCPD Grandstand sina P/Maj. Eric Alino, hepe ng Training Section at duty officer na si P/SMS Fe Bulan nang mapansin ang sling bag ni Manalastas.
Doon nakita ang isang .45 caliber Colt MK IV Series 80 na may serial number 762528, magazine na may pitong bala, PNP ID, LTO driver’s license, National ID, Landbank ATM card, cash na P3,568, at susi ng motorsiklo.
Nahaharap sa kasong paglabag sa RA 10591 o Illegal Possession of Firearm ang nasabing police trainee. (ALMAR DANGUILAN)
