Interpelasyon ipinatitigil
PRA chief kinastigo sa ‘bad manners’ at ‘pagdikta’ sa mga senador

PINUNA ng ilang senador si Philippine Retirement Authority (PRA) chief Cyntia Lagdameo Carrion dahil sa walang tigil na pagte-text sa mga senador para hilingin na gawing prayoridad ang deliberasyon sa panukalang 2024 budget ng Department of Tourism (DOT).

Ayon kay Senador Jinggoy Estrada, walang kahit sino ang may karapatang sabihan sila para tumigil sa pagsasalita dahil tungkulin at trabaho nila na gampanan ang mandato sa senado, kaya walang karapatan si Carrion na utusan o diktahan sila kung ano ang kanilang gagawin.

Ibinunyag ni Estrada, paulit-ulit silang tinitext ni Carrion at iba pang senador kabilang sina Senate President Migz Zubiri, Senators Risa Hontiveros, at Cynthia Villar para sabihing itigil na ang interpelasyon at tapusin na ang deliberasyon sa budget ng iba pang departmento para sumalang na ang DOT.

Dahil dito, nagbanta ang senador na ipapagpaliban o babawasan ang budget ng DOT dahil sa hindi magandang asal ni Carrion.

Ang PRA ay attached agency ng DOT.

Ayon kay Hontiveros, walang sinoman ang may ‘sense of entitlement’ pagdating sa budget ng mga ahensiya ng gobyerno at walang sinoman ang may karapatan para pahintuin sila.

Humingi ng paumanhin si Tourism Secretary Christina Frasco at sinabing lumapit din si Carrion sa kanya at tinanong siya kung bakit hindi ipinaprayoridad ang budget ng DOT sa budget deliberations.

Nangako si Frasco na iiimbestigahan nila ang naging aksiyon ni Carrion. (NIÑO ACLAN)