HATAW! D'yaryo ng Bayan hatawtabloid.com
BINAWIAN ng buhay ang isang babae matapos matabunan at malibing nang buhay sa ilalim ng tone-toneladang tubo nang tumagilid ang isang 14-wheeler truck sa Sitio Cabcab, Brgy. Tabu, sa bayan ng Ilog, lalawigan ng Negros Occidental, nitong Biyernes, 29 Setyembre.
Kinilala ni P/Maj. Joseph Partidas, hepe ng Ilog MPS, ang biktimang si Alma Claridad, 46 anyos, residente sa nabanggit na barangay.
Ayon kay Partidas, naglalakad ang biktima sa tabing kalsada nang sumabog ang kanang gulong ng truck, dahilan upang mawalan ng kontrol sa sasakyan ang driver.
Tinangkang iwasan ni Claridad ang truck ngunit umandar ito patungo sa kanyang direksiyon saka tumagilid at nahulog kaya tumabon sa biktima ang mga kargang tubo.
Inabot ng isang oras ang mga rescuer upang maalis ang mga nakadagang tubo sa biktima.
Dinala si Claridad sa ospital kung saan siya idineklarang wala nang buhay.
Nabatid na aabot sa 35 hanggang 40 toneladang tubo ang nakakarga sa truck nang mangyari ang insidente.
Dagdag ni Partidas, tumakas ang driver ng truck dahil sa takot ngunit nakipag-usap na umano ang pamilya ng biktima sa suspek.
