HATAW! D'yaryo ng Bayan hatawtabloid.com
Sa pinatindi pang anti-crime drive ng pulisya ay sampung katao na pawang may paglabag sa batas ang naaresto sa Bulacan hanggang kahapon ng umaga, Abril 30.
Una sa ulat, ang mga operatiba ng Malolos at Guiguinto C/MPS ang umaresto sa pitong katao sa magkakahiwalay na anti-illegal gambling operations.
Ang Malolos CPS ay arestado ang apat na suspek matapos maaktuhang nagma-mahjong sa Sitio Tuklas, Brgy. Mabolo Malolos City at nakumpiskahan ng mga mahjong playing cubes, dalawang piraso ng dice, isang squared table, apat na monobloc chairs at perang taya sa iba’t-ibang denominasyon.
Ang mga tauhan naman ng Guiguinto MPS ay naaresto ang tatlong suspek matapos maaktuhan sa pagsusugal ng Kara y Cruz sa Brgy. Ilang-Ilang, Guiguinto, Bulacan at nakumpiskahan ng mga ebidensiya tulad ng coins na gamit sa panggara at perang taya sa iba’t-ibang denominasyon.
Samantala, ang pinagsanib na mga operatiba ng Bocaue MPS, SOU3-PNP DEG at Bustos MPS ay nagkasa ng anti-illegal drug operations, na nagresulta sa pagkaaresto ng dalawang suspek sa droga.
Nakumpiska bilang ebidensiya sa mga suspek ang kabuuang siyam na pakete ng pinaghihinalaang shabu at buy-bust money.
Sa inilatag namang manhunt operation ng tracker team ng Bulakan MPS ay naaresto si alyas Nognog, 32, ng Brgy. San Pedro, Area F, San Jose Del Monte City, sa bisa ng warrant of arrest para sa krimeng Grave Threat sa Brgy. Kaypian, San Jose Del Monte City.
Ang mga arestadong suspek at akusado ay kasalukuyang nasa ilalim ng kustodiya ng kani-kanilang arresting unit/station para sa angkop na disposisyon.
Ayon kay Police Colonel Relly Arnedo, provincial director ng Bulacan PNP, ang kapulisan sa lalawigan ay patuloy sa pagiging matapat sa sinumpaang tungkulin na pangangalagaan ang komunidad laban sa mga criminal activities.(Micka Bautista)
