Ex-Starstruck Jeremy Luis muntik mag-quit sa showbiz

MATABIL
ni John Fontanilla

HANDANG-HANDA na muling mag-focus sa kanyang showbiz career ang guwapong dating Starstruck Batch 7 na si Jeremy Luis after hindi i-renew ng GMA Artist Center o mas kilala na ngayong Sparkle ang kanyang kontrata at muntik ding magdesisyong mag-quit sa showbiz at magnegosyo na lang.

Pero ngayong nakahanap na ito ng bagong tahanan via Marikit Artist Management na pinamamahalaan ni Joseph “Jojo” Aleta (CEO ng Marikit) ay ipagpapatuloy na niya ang pag-aartista.

Aminado si Jeremy na may fault din siya kaya hindi na na-renew ang kanyang kontrata sa GMA. Masyado siyang naging abala sa negosyong milktea sa Laguna at hindi na nabigyang oras ang kanyang social media accounts at ‘di nakapag-focus sa kanyang career.

Pero ngayon ay 100% plus ang ibibigay niya sa kanyang career lalo na’t natuto na siya sa kanyang pagkakamali. Pero thankful pa rin siya sa GMA 7 dahil ito ang nag bukas ng pinto sa kanya para matupad ang kanyang pangarap na maging artista.

Nagpapasalamat din ito sa kanyang bagong management sa tiwala at pagkakataong maging parte ng kanilang pamilya.

Makakasama ni Jeremy sa Marikit Artist Management ang award winning actress na si Barbara Miguel, ang guwapong newbie na si Charles Angeles, Angelika Santiago,fomer child star Kyle Ocampo, at ang Masculadosna kinabibilangan nina Robin Robel, Nico Cordova, David Karell, Enrico Mofar, Richard Yumul, at Orlando Sol.