HATAW! D'yaryo ng Bayan hatawtabloid.com
NAMATAY habang itinatakbo sa ospital ang konsehal ng Datu Montawal, sa lalawigan ng Maguindanao, matapos pagbabarilin ng hindi kilalang mga suspek sa national highway sakop ng Brgy. Pagagawan nitong Lunes ng tanghali.
Ayon kay P/Lt. Nurjhasier Sali, acting police chief ng Datu Montawal MPS, kabababa ng biktimang si Konsehal Mubarak Moby Abubakar mula sa kanyang pulang Mitsubishi pick-up sa tabing kalsada upang bumili ng isda nang atakehin ng mga suspek.
Nabatid na habang nakikipag-usap si Abubakar sa tindero ng isda sa gilid ng kalsada, dumating ang dalawang lalaking sakay ng motorsiklo saka pinaputukan ng isa ang konsehal na tinamaan ng bala sa likod ng kanyang ulo at katawan.
Agad dinala ng mga barangay tanod at mga pulis ang biktima sa Deseret Surgimed Hospital sa Kabacan, Cotabato ngunit namatay habang nasa biyahe.
Pahayag ng pulisya, humingi na sila ng tulong sa mga tropa ng 602nd Infantry Brigade ng Philippine Army upang masukol ang mga suspek.
