Kapag rush hour
‘SURGE FEE’ TABLADO SA LTFRB 

HINDI pinaboran ng Land Transportation Franchising and Regulatory Board (LTFRB) ang hiling ng transport group na ‘P1-surge fee’ tuwing rush hour dahil sa patuloy na pagsirit ng mga produktong petrolyo.

“Bagamat magkakaroon ito ng inflationary effect sa ekonomiya ng bansa, isinasantabi muna ito ng ahensiya upang mahimay ang mga puntong inilatag ng transport groups sa naturang petisyon,” pahayag sa kalatas ng LTFRB.

Ayon sa LTFRB, patuloy ang ginagawang pag-aaral sa mga petisyong inihahain sa ahensiya at sa iba pang mga polisiya para sa kapakanan ng mga driver, operators, at mga pasahero.

Reaksiyon ito ng LTFRB sa natanggap na petisyon mula sa Pasang Masda, Alliance of Transport Operators and Drivers Association of the Philippines (ALTODAP), at Alliance of Concerned Transport Organization (ACTO), na humihiling na magpatong ng ‘surge fee’ sa pasahe para sa traditional at modern public utility jeepney (PUJ) at public utility bus (PUB), nitong Biyernes, 14 Oktubre 2022. 

Base sa petisyon, hiling ng transport groups na lagyan ng dagdag-pasahe sa kada kilometrong biyahe tuwing rush hour o peak hours.

Ang isinumiteng petisyon ay kasunod ng patuloy na pagtaas ng presyo ng krudo.

“Nauunawaan ng LTFRB ang hinaing ng mga driver at mga operator na itaas muli ang pasahe dulot nang patuloy na pagtaas ng presyo ng krudo,” saad sa pahayag.

Bukod dito, naiintindihan din umano ng ahensiya ang panawagan ng mga komuter na ang muling pagtaas ng pasahe ay lalong magpapahirap sa kanilang pang-araw-araw na gastusin. (ALMAR DANGUILAN)