Fan made video ng Pepito Manaloto patok

UMANI na ng libo-libong likes sa Facebook ang fan-made video ng award-winning Kapuso sitcom na Pepito Manaloto. 

Patok sa netizens at anime fans ang obra ni Jose Antonio Santos na ginawan ng animation at Japanese version ang nakaka-LSS na theme song ng programa.

Biro ng isang netizen, ”Pepito Manaloto is my favorite slice of life anime.”

Patunay lang ito na sa loob ng isang dekadang paghahatid ng mga nakatutuwang kuwento ng Pepito Manaloto, nananatili pa rin itong paborito ng viewers.

Ang sitcom ay tungkol sa buhay nina Pepito (Michael V.) at asawa niyang si Elsa (Manilyn Reynes) na nabago ang buhay nang tumama si Pepito ng jackpot prize sa lotto.

Bukod kina Michael V. at Manilyn, kabilang din sa cast sina John Feir, Jake Vargas, Angel Satsumi, Arthur Solinap, Mosang, Janna Dominguez, Jessa Zaragoza, Ronnie Henares, at Nova Villa.

Panoorin lagi ang nakaaaliw na adventures ni Pepito at ng Manaloto family, tuwing Sabado, pagkatapos ng 24 Oras Weekend sa GMA. 

COOL JOE!
ni Joe Barrameda