Negosyante, 2 iba pa patay (Sports car sumalpok sa trak)

BINAWIAN ng buhay ang isang negosyante at kaniyang dalawang kasama nang bumangga ang kanilang sinasasakyang Ford Mustang sa isang 10-wheeler truck na may kargang mga tubo sa kahabaan ng Circumferential Road sa Barangay Villamonte, sa lungsod ng Bacolod, noong Martes ng madaling araw, 13 Oktubre.

 

Kinilala ang mga biktimang sina Stanley Flores, isang negosyante; at mga kasamang sina Welton Porcel, at pamangkin nitong si Mark John Porcel, pawang residente sa Barangay Villamonte, sa naturang lungsod, habang kinilala ang driver ng 10-wheeler truck na si Michael Mejica, 42 anyos, mula lungsod ng Kabankalan, sa lalawigan ng Negros Occidental.

 

Ayon kay P/Maj. Charles Gever, hepe ng Bacolod Police Station 4, mabilis na minamaneho ni Flores ang Mustang at nakasunod sa trak nang bumangga ito sa mas malaking sasakyan, dakong 1:00 am kahapon.

 

Sumalpok ang kotse sa likuran ng trak at pumailalim kaya naipit sina Flores at kaniyang mga kasama na sanhi ng kanilang agarang kamatayan.

 

Dagdag ni Gever, inakala ni Mejica na sumabog ang gulong ng kaniyang minamanehong sasakyan ngunit nang kaniyang tingnan, nasa ilalim na ng trak ang Mustang.

 

Patuloy na iniimbestigahan ng mga awtoridad ang insidente.

 

Kasalukuyang nasa kustodiya ng pulisya si Mejica at pakakawalan kung walang kasong isasampa laban sa kaniya sa loob ng reglementary period.