HATAW! D'yaryo ng Bayan hatawtabloid.com
ni ROSE NOVENARIO
NAG-IBA ang ihip ng hangin sa Palasyo kahapon matapos magwagi si Taguig City Rep. Alan Peter Cayetano sa round 2 ng ‘boksing’ nila ni Marinduque Rep. Lord Allan Velasco bilang House Speaker kahapon.
Wala pang 24 oras mula nang muling pulungin kamakalawa ng gabi ni Pangulong Rodrigo Duterte ang mga kongresista para matupad ang 15 -21 term sharing agreement nina Cayetano at Velasco bilang Speaker, pero tila nabahag ang buntot ng Punong Ehekutibo nang hindi sundin mismo ng mga kongresista ang kanyang payo na sundin ang gentleman’s agreement na kanyang binuo noong 2019.
“Stay out tayo riyan. No comment tayo riyan. That’s a purely internal matter of the House of Representatives,” pahayag ni Pangulong Duterte na ipinarating kay Presidential Spokesman Harry Roque kahapon matapos masungkit muli ni Cayetano ang pagiging House Speaker nang tanggihan ng mga kapwa kongresista ang kanyang inihaing resignation bilang pinuno ng Mababang Kapulungan.
Sinabi ni Roque, batay sa kanyang narinig sa mismong bibig ng Pangulo, kung walang numero si Velasco ay wala siyang magagawa.
“Well, ang narinig ko lang po sa bibig ng Presidente, tinanong kasi siya, paanong mangyayari kung wala pong numero si Congressman Lord Allan Velasco at ang sabi ni Presidente e kung wala siyang numero wala na akong magagawa, iyon ang sagot niya. Pero roon sa nangyari kahapon, ang sabi naman po ni Congressman Alan ngayon ay sinabi lang naman niya kay Presidente na bagamat ako ay magre-resign kinakailangan may numero pa rin si Congressman Lord Allan at hindi naman po daw umimik ang ating Presidente. So, parang… hindi ko po alam kung anong basa doon,” ani Roque sa panayam sa DZRH kahapon.
