HATAW! D'yaryo ng Bayan hatawtabloid.com
PARANG nanadya pa si Arnold Clavio na kung ano-ano lang na walang kapararakan ang ipino-post n’ya sa Instagram pagkatapos maglabasan sa social media at mass media ang pagtatapat ni Sarah Balabagan at sumamong pakitunguhan ang anak nilang babae na 21 years old na ngayon.
Hindi sagot ang mga ‘yon sa naging napakasikat na OFW na si Sarah noong kalagitnaan ng Dekada 90 dahil nailigtas siya sa parusang kamatayan kaugnay ng pagkakapatay umano n’ya sa employer n’ya na United Arab Emirates na tinangka siyang pagsamantalahan noong 1994. Isa siyang kasambahay ng isang malaking pamilya na pawang lalaki ang miyembro.
Nainterbyu na si Sarah online kamakailan ni Raffy Tulfo sa public service show nito sa TV5. Sa show na ‘yon ay hinamon na ni Sarah si Arnold na magpakalalaki at aminin na 17 years old pa lang siya noong maging lihim na girlfriend siya ng GMA 7 reporter na nauwi sa pagsisilang n’ya nang ‘di kasal (dahil posibleng may asawa’t anak na si Arnold na 31 years old na noon).
Ang sunod-sunod na inilabas ni Arnold sa Instagram n’ya pagkatapos ng pagbubunyag ni Sarah ay mga larawan n’ya ng pagpapagupit, pagkahilig sa mga prutas, at paglalaro ng golf. Umaasta talaga siya na parang wala siyang nabalitaan tungkol kay Sarah at sa umano’y anak nilang kung tawagjn ni Sarah ay “Ara.”
Ganoon din naman ang GMA 7 na ‘di rin naglalabas ng kahit anong balita tungkol sa mga pagbubunyag ni Sarah.
Siguro nga ay hanggang sa isinusulat namin ito ay wala namang sponsors ang mga programa ni Arnold na nagbabantang ititigil ang suporta nila.
Wala rin sigurong malaking bilang ng mga tagasubaybay ng GMA 7 na desmayado sila sa pagsasawalang kibo ni Arnold tungkol sa pagbubunyag ni Sarah.
Parang wala namang humihiling na tanggalin si Arnold sa trabaho dahil kahihiyan siya para sa Kapuso Network. Ang ini-expect lang ng ilang mga tao ay tanggapin ni Arnold na totoo ang ibinunyag ni Sarah o itanggi ito. Hindi naman nagbabalak si Sarah na makahanap ng paraan na idemanda si Arnold. Hindi rin siya humihingi ng financial support para sa umano’y anak nila.
KITANG-KITA KO
ni Danny Vibas
