China hinikayat ni Duterte magpatrolya (Gaya sa Somalia, Malacca Strait at Sulu Sea proteksiyonan)

INANYAYAHAN ni Pangulong Rodrigo Duterte ang China na magpatrolya sa international seas, ang hangganan ng Malaysia, Indonesia at Filipinas, upang masugpo ang kidnapping at piracy, na nagdudulot nang pagtaas ng presyo ng serbisyo at bilihin sa buong mundo.

“I also asked China. If they can patrol the international waters without necessarily intruding into the territorial waters of countries, we would be glad if we have their presence there,” anang Pangulo.

Aniya, kapag hindi naresolba ang naturang mga suliranin, maaaring iwasan ng mga cargo ship na magdaan sa Malacca Strait at Sulu Sea, umikot sa mas malayong ruta, magreresulta sa mas mataas na gastos na ipapasa ng mga negosyante sa presyo ng mga serbisyo at bilihin, na magiging pabigat sa mga consumer.

Hindi aniya kailangan na military ships ng China ang magpatrolya, kahit coast guard ships ay ubra na, tulad nang ginawang pagtulong ng Beijing sa Somalia.

“Hindi naman kailangan gray ships e. Sabi ko maski ‘yung coast guard cutter just to patrol like what they did in Somalia. Tumulong sila. Somalia has toned down. But dito sa Malacca Strait pati dito sa Sulu Sea, it remains to be a big problem. And kung masara ‘yan diyan, either they go up to the North, and if they’re headed for Mexico, down south, or dito ka magdaan sa mas malapit, which would mean higher costs, higher rate, higher insurance, it adds up to the goods and the services that governs the world, it’s always goods and services,” ani Duterte.

Matatandaan, tumulong ang People’s Liberation Army Navy ng China sa pagsugpo ng hijacking at piracy sa karagatan ng Somalia.

Bago kumilos ang China ay umabot sa $7 bilyon kada taon ang nawawala sa ekonomiya ng buong mundo dahil sa piracy at hijacking.

(ROSE NOVENARIO)