Mark Anthony inilipat sa Angeles District Jail

INILIPAT na ng kulungan ang aktor na si Mark Anthony Fernandez habang dinidinig ang kanyang kaso sa Pampanga kaugnay sa pagkaaresto sa kanya ng mga pulis dahil sa nakuhang marijuana sa kanyang sasakyan.

Umaga nitong Sabado nang ilabas si Mark Anthony sa Station 6 ng Angeles City-Police para ilipat sa District Jail ng nabanggit na bayan.

Ang paglilipat ay ginawa batay na rin sa mosyon na inihain sa korte ng kampo ng aktor dahil masikip ang piitan sa Station 6.

Ngunit sa mosyon ng kampo ni Mark Anthony, nakasaad sa kanilang kahilingan sa korte na sa Provincial Jail siya ilipat.

Sa commitment order na inilabas ng korte nitong Biyernes ng hapon, iniutos dalhin su District Jail dalhin sa aktor.

Hindi agad naipatupad ang paglilipat dahil sa kakulangan ng panahon at inabot na ng dilim.

Bago siya ilipat ng kulungan nitong Sabado ng umaga, dinalaw siya ng inang si Alma Moreno.

Tumanggi nang magpa-interview ang aktres ngunit sinabi niyang maayos ang lagay ng kanyang anak.

Ayon sa ulat, bagaman masikip din sa District Jail, may lugar na maaaring makapaglakad ang mga bilanggo.