HATAW! D'yaryo ng Bayan hatawtabloid.com
PUSH pa more. Pinag-usapan na nga ang kakaibang pagganap ng nakababatang kapatid ni Coco Martin na si Ronwaldo sa Pamilya Ordinaryo at marami rin ang nagsabing kung sakaling aalagwa nang husto ito eh, siguradong ibang landas din ang tatahakin nito sa kanyang pag-arte.
Kumpara sa kanyang Kuya, mukhang ang tipo ni Ronwaldo ang matagal mag-warm-up sa pagiging outspoken maski sa mga nakakasama sa trabaho. Ayon nga sa tumatayong handler nito na si Ferdinand Lapuz, nang magtungo sila sa Italy kamakailan, hindi pa rin daw maalis kay Ronwaldo ang pagiging mahiyain. Todo ang suporta ng Kuya niya kay Ronwaldo at talagang bawat kilos nito eh, inaalam.
Ayon kay Ronwaldo, ”Nag-enjoy naman kami sa Venice. Ang saya ko po kasi, noon ang ginagalaan ko lang eh, Novaliches. Ngayon, sa Italy na ako nakapasyal.”
Ngayon nga ay nagsimula na ito sa isa pang pelikula, ang Kids of War na isinu-shoot sa Tayabas, Quezon.
Iisang landas man ang sinimulan nila ng Kuya Coco niya, nakikinitang iba pa rin ang ibubunga ng pagsisikap ni Ronwaldo na maging isang mahusay na aktor na kikilalanin din gaya ng Kuya niya.
At mukhang lahat din naman ng bilin ng Kuya niya eh, sunod na sunod ni Ronwaldo. Gaya ng panliligaw at pagkakaroon ng karelasyon.
“Ayoko pong biguin ang Kuya ko. Ito po ang sinabi kong gusto kong gawin at sinusuportahan naman niya ako. Kaya, lahat naman po eh, gagawin ko para hindi ako mapahiya sa kanya.”
Sa ngayon, ini-enjoy din muna nito ang pagdalo sa mga film festival abroad. At talagang ibinibilin sa kanya ni Coco na huwag palampasin ang nasabing mga pagkakataon.
Inaabangan na lang ang pagsasama nila sa isang proyekto o kung kailan magpo-produce ng pelikula kundi man TV project para kay Ronwaldo si Kuya.
HARDTALK – Pilar Mateo
