Direk Olive, sobra ang pagka-perfectionist

Kasama rin sa pelikula si Aiko Melendez na gumaganap na tiyahin ni Daniel. Ayon kay Aiko, ikalawang beses na niyang nakatrabaho si Direk Olivia.

“Nakasama ko na siya roon sa unang movie na ginawa niya, ‘yung ‘Maalaala Mo Kaya (The Movie)’. Kaya noong i-offer sa akin itong ‘Barcelona’, noong ipinadala sa akin ‘yung script, hindi ko na ‘yun binasa, go na agad ako kasi nalaman ko na si Inang pala ang magiging direktor namin,” sabi ni Aiko.

Kilalang mabusising direktor si Direk Olivia, perfectionist ito. Kaya kahit mahusay na aktres si Aiko ay may isang eksena siya sa Barcelona na naka-take 13 siya.

“’Yung eksena kong ‘yun, kasama ko roon si Kathryn. Simple lang naman ‘yung eksena, kaya lang dahil nga mabusisi si Inang kaya ayun nakaraming take ako,” natatawang kuwento ni Aiko.

Ang Barcelona: A Love Story Untold ay showing na sa September 14. Tampok din dito sina Ana Capri, Joshua Garcia, Liza Dino, Cris Villanueva, Joey Marquez, at Ricky Davao.

( ROMMEL PLACENTE )