Ang Probinsyano ni Coco, ayaw bitawan ng manonood

NAPANOOD namin ang episode ng FPJ’s Ang Probinsyano noong Lunes na bugbog sarado si Coco Martin alyas Cardo sa kamay ni Victor Neri bilang si Mayor Anton Guerrero na may hawak ng mga pasugalan sa barangay na nasasakupan ni Kapitana Flora o Lola Kap.

Habang binubugbog si Cardo ay nakasabit naman sa lubid si lola Kap na nagmamakaawa kay Mayor Anton na nahuli rin sa bandang huli dahil dumating ang mga kasamahan ni Cardo at mga pulis sa pangunguna ni Maja Salvador bilang si Glen na inakalang patay na ang kababata kaya nag-iiyak at dito nalaman ng manliligaw niyang si John Prats na hindi siya gusto ng dalagang pulis.

At dahil nahuli na si Neri ay papasok naman ang karakter na si Martha na gagampanan ng Hugot Queen na si Angelica Panganiban.

Si Martha ay sangkot sa lumalalang kalakalan ng droga sa bansa. Bukod kay Angelica, isang bagong karakter din ang dapat abangan sa pagpasok sa serye ng Kapamilya actress na si Nikki Valdez bilang si Analyn.

Mapapanood na rin ang mga maaaksiyong tagpo ng seryeng FPJ’s Ang Probinsyano ang mga eksenang kinunan pa sa Hong Kong.

Bongga, nag-shooting pala ang Ang Probinsyano sa HK, ano kayang bansa ang susunod? Mukhang maraming lugar ang lilibutin ng serye nina Coco dahil ayaw bitawan ng mga manonood dahil muling nagtala ng 44% sa ratings game.

FACT SHEET – Reggee Bonoan