Incoming PNP Chief nag-warning vs summary killings

NAGBABALA ang incoming chief PNP na si Chief Supt. Roland dela Rosa sa mga pulis na huwag ilalagay sa kanilang kamay ang batas kaugnay sa pinag-ibayong kampanya laban sa illegal drugs at iba pang krimen.

Ginawa ni De la Rosa ang pahayag kasunod ng mga impormasyon na nito lamang nakalipas na mga linggo ay dumarami ang mga suspek na sangkot sa droga ang napatay ng mga pulis.

Ayon sa heneral, baka “motivated” lamang o “confident” ang mga pulis lalo na at papasok ang bagong administrasyong Duterte.

Agad din siyang dumistansiya sa isyu kung nagpapakitang gilas lamang o nagpapasiklab ang mga pulis ngayon sa kampanya laban sa ilegal na droga.

Samantala, tiniyak ni Dela Rosa na “hate na hate” niya ang summary killings na kinasasangkutan ng mga pulis.

Sa lalawigan ng Cebu, naiulat ang isang hinihinalang magnanakaw na pinatay, ibinalot nang packaging tape ang katawan at isinulat sa bond paper ang katagang “TULISAN KO” at “DUTERTE.”

Sinabi ng one star police general, hindi pa niya alam ang detalye ng nasabing kaso, ngunit ayaw raw niya na nasasangkot ang mga tauhan sa summary killings dahil ilegal itong gawain.

Dapat aniyang managot sino man ang mga may kagagawan.

Nagbabala rin siya sa mga gagaya pa o “magda-dramatize” sa nasabing gawain.

Kasabay nito, binalaan din niya ang mga barangay kapitan na hindi makikipagtulungan sa kampanya laban sa droga.