Pinaka-corrupt: BIR, BoC, LTO bubuwagin ni Duterte

NAGBANTA si incoming President Rodrigo Duterte na bubuwagin ang tatlong pinaka-corrupt na ahensiya ng pamahalaan pag-upo niya sa Palasyo sa Hunyo 30.

Aniya, lulusawin na lamang niya ang Bureau of Internal Revenue (BIR), Bureau of Customs (BoC) at Land Transportation Office (LTO) dahil sa pagiging corrupt nito.

“I am very sorry pero sabihin ko sa inyo, isa sa pinaka-corrupt na agency ang BIR, Customs, LTO, iyang tatlong iyan. I-abolish ko na lang para wala na,” wika pa ni Duterte sa press conference sa Davao City kahapon ng umaga.

Binatikos din ni Duterte ang kawalang-silbi ng Philippine Drug Enforcement Agency (PDEA) dahil sa pagkabigo nitong labanan ang illegal drugs dahil karamihan sa mga opisyal at empleyado nito ay sangkot sa narcotics trade.

Sinabi ni Duterte, isang high-ranking official ng PDEA ang dapat sibakin sa ahensiya dahil sa pakikipagsabwatan sa drug syndicate.

Pahahawakan ni Duterte sa military ang PDEA pati na ang Bureau of Immigration (BI) at Bureau of Corrections (BuCor) na pinamamahalaan ang New Bilibid Prison (NBP).

Nagbabala rin si incoming President Duterte sa local officials na sangkot sa illegal drugs na huwag silang magkakamali.

“Huwag kayong magkakamali d’yan, kung naaawa kayo sa sarili n’yo. P*****. Mamamatay kayo d’yan,” pagbabanta ni Duterte.