HATAW! D'yaryo ng Bayan hatawtabloid.com
DINAKIP ng mga awtoridad ang isang professional basketball player nang nakawan ng halik ang isang babaeng kaniyang nakasalubong sa bar na nauwi sa rambol nitong Sabado ng gabi, 28 Marso, sa Bonifacio Global City, sa lungsod ng Taguig.
Nabatid na nakabanggaan ng 22-anyos biktima ang dating manlalaro ng Talk ‘n’ Text na si Mac Cardona, sa smoking area ng bar nang bigla siyang hatakin saka hinalikan.
Matapos ang insidente, nagsumbong ang biktima sa kaniyang nobyo na siyang kumumpronta kay Cardona na humantong sa suntukan.
Nabatid na bukod sa biktima, may iba pa umanong mga babaeng hinalikan ang suspek.
Nang dumating ang mga nagrespondeng pulis, tumigil ang gulo ngunit may sugat na ang mata ng nobyo ng biktima na dinukot umano ni Cardona.
Napag-alaman ng Taguig CPS na tatlong beses nang nasampahan ng iba’t ibang kaso ang manlalaro, kabilang ang paglabag sa Anti-Violence Against Women and their Children act (VAWC).
“Ang suspect ay may kaso noong 2016 VAWC, 2018 VAWC, tapos noong 2021 ay kidnapping and failure to return a minor,” pahayag ni P/Capt. Ibralen Jain, Section Chief ng Taguig CPS Women and Children Protection Section.
Samantala, tumangging makipag-areglo ang mga biktima sa suspek na sasampahan ng kasong Acts of Lasciviousness at Physical Injuries.
