ProtekTODO Fire 99 inilunsad ng Palawan para sa pamilyang Pinoy

INILUNSAD ng Palawan ProtekTODO, ang microinsurance arm ng Palawan Group of Companies, sa pakikipagtambalan sa Liberty Insurance, ang ProtekTODO Fire 99, isang abot-kayang insurance product na naglalayong magbigay ng pinansyal na proteksyon sa mga pamilyang Pilipino laban sa pinsalang dulot ng sunog.

Kasabay ng paggunita sa Fire Prevention Month, nag-aalok ang ProtekTODO Fire 99 ng tulong pinansyal para sa mga residential property na naapektuhan ng sunog, pati na rin ng benepisyo para sa aksidenteng pagkamatay.

Sa halagang P99 pesos lamang, maaaring makakuha ang mga policyholder ng hanggang P30,000 na tulong pinansyal para sa sunog at hanggang P10,000 na benepisyo para sa aksidenteng pagkamatay.

Sa isang media briefing na ginanap kamakailan, ipinakilala ang ProtekTODO Fire 99 bilang bahagi ng layunin ng kumpanya na palakasin ang kaalaman ng publiko sa pag-iwas sa sunog at kahalagahan ng financial preparedness sa panahon ng sakuna.

Ayon kay Lisa Castro-Sabado, Chief Business Development Officer ng Palawan Group, layunin ng produkto na magbigay ng abot-kayang suportang pinansyal na makatutulong sa mga pamilyang naapektuhan ng sunog na makabangon mula sa pinsala.

“Maaaring baguhin ng sunog ang lahat ng pinaghirapan ng isang pamilya sa isang iglap. Maaari nitong kunin ang kanilang tahanan, mga ari-arian, at ang pakiramdam ng seguridad na kanilang pinaghirapang buuin sa paglipas ng mga taon. Sa pamamagitan ng ProtekTODO Fire 99, may maaasahang suporta ang mga pamilya upang makabangon at muling maitayo ang kanilang buhay,” ani Castro-Sabado.

Ibinahagi rin sa briefing ang karanasan ng isang claimant mula sa Addition Hills, Mandaluyong na nagsabing malaking tulong ang insurance upang makabangon ang kanilang pamilya matapos masunugan—isang halimbawa ng layunin ng Palawan Group na ituring ang kanilang mga suki bilang kapamilya na karapat-dapat sa tunay na suporta at pagkalinga.

Samantala, binigyang-diin ng mga datos mula sa Bureau of Fire Protection na patuloy ang banta ng sunog sa bansa. Sa ulat ng BFP–National Capital Region, umabot sa 3,565 insidente ng sunog ang naitala sa Metro Manila.

Kabilang sa pangunahing sanhi ng sunog ang mga depektibong koneksyon sa kuryente, paninigarilyo, at pagluluto gamit ang bukas na apoy, na nagpapakita kung paanong ang karaniwang gawain sa tahanan ay maaaring mauwi sa malubhang sakuna kung hindi masusunod ang tamang pag-iingat.

Ayon kay Gladwin Abram So, Fire Marshal ng Association of Volunteer Fire Chiefs and Firefighters of the Philippines Inc., mahalaga ang pagpapalawak ng kaalaman ng publiko upang mabawasan ang panganib ng sunog.

Aniya, marami sa mga karaniwang sanhi ng sunog—lalo na ang mga problema sa electrical connections—ay maaaring maiwasan kung ang mga tao ay may sapat na kaalaman at nagsasagawa ng mga pangunahing hakbang sa kaligtasan.

Dagdag pa ni Bernard Kaibigan, Chief Marketing Officer ng Palawan Group, ang ProtekTODO Fire 99 ay idinisenyo upang gawing mas simple at madaling ma-access ang insurance para sa mga Pilipino.

“Naniniwala kami na ang bawat pamilyang Pilipino ay nararapat magkaroon ng proteksyon at kapayapaan ng isip. Sa pamamagitan ng ProtekTODO Fire 99, nais naming tiyakin na kapag may dumating na krisis, may safety net na tutulong sa mga pamilya na makabangon,” aniya.

Mabibili ang ProtekTODO Fire 99 sa mga sangay ng Palawan Pawnshop–Palawan Express Pera Padala sa buong bansa, pati na rin online sa pamamagitan ng PalawanPay app, Lazada, at Shopee.

Sa pamamagitan ng pagpapalakas ng kamalayan sa pag-iwas sa sunog at pagbibigay ng abot-kayang proteksyon, layunin ng Palawan ProtekTODO na gawing mas accessible ang kaligtasan at financial security para sa bawat pamilyang Pilipino.