HATAW! D'yaryo ng Bayan hatawtabloid.com
OPISYAL na binuksan ang Taguig Arts Festival 2026 nitong nakaraang Sabado, 28 Pebrero, sa pamamagitan ng ribbon-cutting ceremony at engrandeng paglulunsad sa Vista Mall Activity Center, na nagpasimula sa dalawang araw na pagdiriwang ng pagkamalikhain tampok ang iba’t ibang anyo ng kultura at komunidad sa sining, kasabay ng Pambansang Buwan ng Sining.
Pinangunahan ni Mayor Lani Cayetano ang seremonya kasama sina District 2 Rep. Jorge Bocobo at ang pinuno ng Think Big Taguig na si Chi Bocobo; mga miyembro ng Konseho ng Lungsod; ang kilalang Filipino artist at mismong taga-Taguig na si Danny Rayos del Sol at si Tess Rayos del Sol ng National Commission for Culture and the Arts (NCCA) National Committee on Art Galleries; ang pamamahala ng Vista Mall sa pangunguna nina Mall Head Albert Tinedero at Marketing Head Jhoiye Castillo; pinuno ng LYDO na si Atty. Aldrin Sinues; at Pangulo ng SK Federation na si Joanna Pagkalinawan.
Dala ang tema ng NCCA na “Ani ng Sining: Katotohanan at Giting” itinampok ng pagdiriwang ang mga pagsisikap ng lungsod na suportahan ang tunay na sining habang pinararangalan ang katapangan at talento ng local creators.
Sa kanyang mensahe, binigyang-diin ni Mayor Lani ang halaga ng sining bilang isang uri ng katalinohan at pagpapahayag ng sarili.
“Hindi lang po sa akademikong aspekto nasasanay o nasusukat ang talino ng tao, maski po sa sining. Maituturing po natin itong katalinohan. Huwag tayong matakot na maging malikhain at huwag nating kalimutan na isang porma ng katalinohan ng tao ang kahusayan sa arts.”
Isa sa mga pangunahing atraksiyon ng pagdiriwang ay ang isang tampok na eksibit na nagpapakita ng mga gawa ng 21 Taguig artists at 53 artworks na sumasalamin sa lalim at pagkakaiba ng lokal na malikhaing komunidad.
Nagtipon din ang Art Mart na may 21 kalahok na merchants na nag-aalok ng mga sticker, print, handcrafted item, at iba pang malikhaing produkto, na nagbibigay ng puwang para sa mga artist at creative entrepreneur na kumonekta sa publiko.
Bilang dagdag na enerhiya sa pambungad na programa, ang United as 1 (UA1), ang kasalukuyang kampeon ng Tugtog ng Taguig Sayaw Edition, ay nagtanghal tampok ang pagkakaisa sa dinamikong diwa ng sining.
Nagpatuloy ang programa hanggang hapon sa pamamagitan ng mga interactive session tulad ng mga workshop sa paggawa ng beads at paggawa ng kape, isang art appreciation talk, isang cosplay discussion, at mga workshop sa teatro at sayaw, na nagbigay sa mga kalahok ng mga pagkakataong tuklasin ang iba’t ibang anyo ng artistikong pagpapahayag. (NIÑO ACLAN)
