Kylie sakaling tumakbong VP si Robin: aalis na ‘ko ng Pilipinas

MA at PA
ni Rommel Placente

MUKHANG hindi sang-ayon si Kylie Padilla sakaling tumakbo sa mas mataas na posisyon sa gobyerno ang kanyang amang si Robin Padilla.

Nausisa kasi ang aktres tungkol sa posibleng pagtakbo ng kanyang ama sa susunod na national elections sa naganap niyang press conference, sa The Lotto Winners.

“Aalis na ‘ko ng Pilipinas,” natatawang sambit ni Kylie.

Nang matanong naman si Kylie kung suportado ba niya ang political career ng ama ay tila ayaw nitong magbigay komento.

“Aalis na po ako ng Pilipinas… iyon lang po ang comment ko,” aniya pa.

Pagpapatuloy ni Kylie, “Hindi, ano lang naman, I trust in my father’s judgment, ‘yon lang.”

Nauna nang sinabi ni Sen. Robin na wala siyang planong tumakbo sa 2028 national elections ngunit aniya, kung sakaling iutos ng dating Pangulong Rodrigo Duterte, na tumakbo siya, ‘yun ang magpapabago ng kanyang desisyon.