HATAW! D'yaryo ng Bayan hatawtabloid.com
HARD TALK
ni Pilar Mateo
SA March 11, 2026, may isa na namang pelikulang ihahandog ang Viva sa madla.
Muling pagsasama nang sumabog ang kemistri sa Meet Me in St. Gallen na sina Bela Padilla at Carlo Aquino. This time, si Jerry Lopez Sineneng naman ang nakaranas ng magandang pakikipag-trabaho sa kanila.
At sinabi nga nito sa grand mediacon na both were take 1 actors.
May kinuha siyang coach for the both actors, hindi para turuang umarte kundi para lang dagdagan pa ang ilang kailangan sa eksena.
Tungkol sa Alzheimer’s ang kwento ng karakter sa pelikula. Mula sa paningin ng isang nagmamahal.
A Special Memory. Mga nakakalimutan. Naaalala. Nabubura. Nawawala.
Natanong sila sa mga kantang magpapaalala sa kanila ng maraming bagay sakaling mawala sa tamang ulirat at makalimot na.
Born Free. Yellow Submarine. Iris. La Traviata. Bridge Over Troubled Water. Pati Bakya Mo Neneng. Obviously.
Mahirap makalimutan. Ang takot ni Carlo sa matataas na lugar. Ang panonood ng sine ni Bela kasama ang kanyang lolo.
Maganda nga talaga ang kinakabasan ng pagsasama ng dalawang taong maganda ang mga ganap sa buhay.
Nagkakaintindihan.
May pamilya na si Carlo. Na binago sa pagdating ng supling na si Mithi at maybahay.
Marami naman na rin daw siyang kinalimutan na. Si Bela unti-unti nasasabi na, na may nagmamahal na sa kanya pero ‘di pa maibulalas. Kung sino!
May Japanese at Korean versions na pinaghugutan ang pelikula. Pero nagawa itong Pinoy na Pinoy dahil sa elemento ng pamilya.
Ginusto ni Bela na makuha ang proyekto. Alam niyang maganda. Matino. At makakasamang muli si Carlo.
Kaya naman ang dasal nila eh, tangkilikin ito ng mga manonood. Alam nila at mulat na sa pagbabago ng panahon sa mabilis na pag-usad ng lahat. Pero naniniwala silang hindi sila mapapahiya sa pagsisiwalat ng istoryang pwedeng mangyari sa lahat.
Hindi tipikal ang istorya nina Sandra at Dindo.
Mapapa-isip ka. May gugustuhin ka bang kalimutan o burahin kung sakaling dumating ang ganoong sitwasyon sa ‘yo.
Mas gusto ng mga bida na ang magagandang mga alaala ang manatili at bumalik sa isip nila.
What the mind forgets… the heart remembers.
Ito ‘yung Pure Soul ng Korea. Pero A Special Memory ng Pinoy.
Lalo pang mai-in love ang manonood lalo na at ang Concert King na si Martin Nievera ang magpapa-ingay sa theme song nito na una nating narinig kay Iwi Laurel.
