HATAW! D'yaryo ng Bayan hatawtabloid.com
KINOMPIRMA ni National Security Adviser Eduardo Año ang ginawang pag-aresto sa isang Mongolian national na nag-enroll sa isang aviation school sa Zambales ngunit inilihim ang pagiging jet fighter pilot ng People’s Liberation Army (PLA) ng China.
Kinilala ang naarestong Mongolian na si Boldbaatar Bold-Erdene, 30 anyos, dinampot noong 12 Pebrero sa isang aviation school sa Brgy. Lipay, Dingin, Iba, Zambales.
“The said foreign national who enrolled as an aviation student concealed his military background and service with the People’s Liberation Army, especially his jet fighter license from the PLA Air Force Aviation University,” bahagi ng pahayag ni Año nitong Martes, 17 Pebrero.
“Such non-disclosure constitutes a serious violation of Philippine immigration laws. Moreover, his presence and actions in Zambales near vital military locations are clearly inconsistent with his purpose of stay in the country,” dagdag ng National Security Adviser.
Lumitaw sa record ng Bureau of Immigration (BI) na si Bold-Erdene ay graduate ng Defense University at Civil Aviation University of China.
Inaresto ang naturang Mongolian nang magsagawa ng aerial photography sa Iba Airport at Palauig River, na may layong five nautical miles mula sa airport, habang nagsasagawa ng flight exercises.
Dinampot si Bold-Erdene ng mga tauhan ng Philippine Army, Philippine National Police (PNP) at iba pang intelligence units ng pamahalaan. (MICKA BAUTISTA)
