PDL nakapuga sa provincial jail

KASALUKUYANG nagsasagawa ng pinaigting na manhunt operation ang pulisya matapos makatakas ang isang PDL (person deprived of liberty) mula sa Zambales Provincial Jail sa Sitio Balili, Brgy. Palanginan, Iba, Zambales.

Kinilala ang nakatakas na PDL na si Emilliano Agustin, 38 anyos, may kasong paglabag sa RA 9165 o Comprehensive Dangrous Act of 2002, residente sa Brgy. Lipay, Sta. Cruz, sa naturang lalawigan.

Ayon sa saksi na isang prison guard, na siyang assistant commander ng naturang piitan, naganap ang insidente habang siya ay tumutulong sa isa pang PDL.

Sinasabing sinamantala ng tumakas ang pagkakataon at biglang tumakbo palabas sa Post 2 gate, dumeretso sa main gate, at tuluyang nakalabas ng pasilidad.

Agad nagresponde ang mga tauhan ng Iba MPS at nakipag-ugnayan sa mga karatig himpilan ng pulisya at iba pang law enforcement agencies upang magsagawa ng checkpoints at hot pursuit operations para sa agarang pagkakaaresto ng nasabing preso.

Tinitiyak ng Zambales PPO sa publiko na patuloy ang mas pinaigting na operasyon sa paghahanap laban sa nasabing pugante. (MICKA BAUTISTA)