Negosyanteng kidnap victim nasagip
Kidnappers natunton sa digital payment

ARESTADO ang tatlong suspek at matagumpay na nasagip ng mga awtoridad sa lungsod Quezon ang isang lalaking negosyante matapos dukutin at ipatubos sa halagang P50 milyong ransom.

Ayon kay Philippine National Police – Anti-Kidnapping Group (PNP-AKG) chief, P/BGen. Glicerio Cansilao, ligtas na ang biktima at kapiling na ang kaniyang mga kapamilya, habang nasakote ang tatlong suspek an kinilala sa mga alyas na AG, TP, at MD.

Nauna nang humingi ng tulong ang pamilya sa PNP-AKG nang hindi nakauwi ang biktima sa kanilang bahay at hindi na rin matawagan sa telepono.

Huling nakita ang biktima sa lungsod ng Mandaluyong noon pang 12 Pebrero.

Sa isinagawang CCTV backtracking at intelligence operation, nakita ng mga awtoridad ang pagtangay ng mga suspek sa biktima.

Napag-alaman na humingi ang mga suspek ng P50-milyong ransom upang palayain ang biktima.

Bumaba ang ransom sa P4,000,000 hanggang nagbayad ang pamilya ng inisyal na P250,000 sa pamamagitan ng digital wallet.

Ito ang ginamit ng mga tauhan ng PNP-AKG upang makakuha ng impormasyon at matukoy ang kinaroroonan ng mga suspek.

Nang makakalap ng sapat na detalye, isinagawa ng mga awtoridad ang rescue operation hanggang madakip ang tatlong suspek.

Pahayag ni Cansilao, may iba pang suspek ang pinaghahanap kabilang ang mastermind sa pagdukot sa biktima.

Kasalukuyan nang inihahanda ang mga karampatang kasong isasampa laban sa mga suspek.