HATAW! D'yaryo ng Bayan hatawtabloid.com
ARESTADO sa pinagsanib na operatiba ng Romblon Police at Bureau of Immigration (BI) ang isang British national dahil sa pagiging overstaying sa bansa sa isinagawang operasyon sa isang resort sa lalawigan ng Romblon nitong Lunes ng hapon.
Kinilala ang dinakip na dayuhan na si Andrew Charles Beaumont, 48 anyos, dating guro at nagtatrabaho bilang isang scuba instructor sa Romblon.
Bandang 4:30 ng hapon nang masakote si Beaumont sa resort sa Sta. Fe, Romblon kaugnay ng kasong paglabag sa Republic Act No. 613, o ang Revised Immigration Act of 1940.
Ang nasabing Briton ay tubong Hull, Yorkshire, England, pansamantalang nanunuluyan sa Brgy. Agpudlos, San Andres, Romblon.
Ayon sa Romblon Police, base sa tala ng BI, si Beaumont ay dumating sa Filipinas noong 19 Setyembre 19 ,2022 bilang isang dayuhang turista pero hindi ito lumabas ng bansa.
Nag-expire ang pinalawig na pananatili ng Briton sa Filipinas noong 17 Nobyembre 2023 kaya ikinokonsidera na siyang overstaying alien.
Pansamantalang isinailalim sa kustodya ng Criminal Investigation and Detection Group (CIDG) Romblon si Beaumont na nakatakdang i-turnover sa BI Fugitive Search Unit kaugnay ng kasong kinakaharap nito at deportasyon.
