Nawawalang biyuda ng ex-tserman natagpuang nakabaon sa bakuran

NATAGPUAN ang nawawalang misis ng yumaong dating barangay chairman ngunit hindi buhay kundi bangkay na nakalibing sa compound ng kanilang mismong tahanan sa Angeles City, Pampanga kamakalawa.

Ang bangkay ng biktimang si Tess Mamac ay nadiskubre sa isinagawang paghuhukay sa compound na pag-aari ng kanilang pamilya na kinatitirikan ng kanilang tahanan.

Sa report ng Angeles City Police, ang ginang ay nakabaon na tinatayang anim na talampakan ang lalim ng lupa sa naturang compound malapit sa bahay ng driver ng kanilang pamilya na kinilala lamang sa alyas na “Doc Manuel”.

Si Tess, misis ng yumaong si Tony Mamac, dating chairman ng Brgy. Balibago ay may ilang araw nang nawawala simula pa noong 12 Pebrero.

Samantala, habang nagsasagawa ng search operations ang Angeles City Police sa nawawalang ginang ay nag-alok si Pampanga 1st District Rep. Carmelo “Pogi” Lazatin, Jr. ng P200,000 reward para sa makapagtuturo sa kinaroroonan ng biktima.

Nabatid na ang driver ng pamilya Mamac ay may 20 taon nang naninilbihan sa kanila at ngayo’y itinuturing na “person of interest” sa kasong ito. Kasalukuyan pang pinaghahanap ang driver upang mabigyang linaw ang krimen.