Minamanaheo ng Aviation police
Van umararo ng 14 motorsiklo, 12 driver, 9 backrider sugatan

NAWALAN ng preno ang isang multi-purpose vehicle (MPV) na nagresulta sa pag-araro sa 14 motorsiklo na may 9 backrider at isang kotse, sa Cayetano Boulevard sa Barangay Tuktukan, Taguig City, gabi ng Lunes, 16 Pebrero.

Itinakbo sa ospital ang 12 drivers at 9 backriders na pawang sugatan.

Sa kuha ng CCTV ng Taguig Traffic Investigation Office, ang insidente ay naganap petsang 16 Pebrero 2026 Lunes may oras na 18:00:52.

Klaro ang pag-araro sa mga nasa unahang motorsiklo sa kaparehong lane bago huminto at bumangga sa steel barrier at sa sidewalk. Nakita rin ang pag-ilalim at pagkaipit ng isang backrider na nakaladkad nang ilang metro.

Mabilis na kumilos ang mga lumapit na ilang motorista para iangat nang patagilid ang sasakyan kaya natanggal sa pagkakaipit ang isang biktima.

Ang driver na nagsabing nawalan ng preno ay isang police staff sergeant ng Aviation Security Group, ayon sa ulat at hindi naman umano lasing o amoy alak.

Ayon kay P/Lt. Andres Echavez, Jr., chief ng Taguig Traffic Investigation Office, 14 motorsiklo at isang kotse ang nadamay sa insidente.

Nakipag-areglo ang driver sa mga biktima na sasagutin ang mga gastusin at pinsala ng mga sasakyan.

Kasalukuyan pang nakapiit ang pulis, na posible rin makalaya kung walang magsasampa ng pormal na reklamo makalipas ang 18 oras na reglementary detention period.