Mon nagbabalik pagtingin kay Ynez

KINUHA ang reaksiyon ni Mon Confiado sa pagpaparetoke ng dati niyang girlfriend na si Ynez Veneracion.

Nanibago ba siya sa itsura ni Ynez noong una niya itong makita matapos sumailalim sa beauty enhancement?

Sagot ni Mon, “To be honest, hindi. Pero noong una, medyo may mga reaction din ako katulad din niyong mga basher niya, alam ni Ynez iyon.

“Sabi ko, ‘Ang ganda-ganda mo na! Ang ganda ng ilong mo, ang ganda mo! Bakit mo pa pinagalaw?’

“Pero minsan kasi, ganoon tayo, eh ‘di ba? Alam ko kasi ang back story ni Ynez from… kasi, 17 years kaming magkasama. So iyong kanyang self-confidence ay sobrang baba,” rebelasyon ng aktor.

“Kaya minsan iyong tao, talagang gagawin mo lahat para sa isip mo, maganda ka. Maging confident ka.

“So kung iyon ang makatutulong sa confidence niya, eh, wala tayong karapatan para i-bash siya, ‘di ba?” aniya pa.

Sundot na tanong sa kanya kung bumabalik ba iyong dating pagtingin niya kay Ynez kapag nagkikita uli sila?

“Ewan ko, parang ano, eh. Parang tingin ko, 17 years ago pa rin ang itsura niya, eh. Kasi 17 lang si Ynez noong naging girlfriend ko. Sa akin nagdalaga iyan, eh.”

Samantala, magkasama sina Mon at Ynez sa pelikulang Batang Paco. Showing na ito sa mga sinehan sa February 18. Mula ito sa  direksiyon ni Rechie del Carmen at mula sa panulat ni Gina Marissa Tagasa. 

Kasama rin sa cast sina Chichi Rita, Cassy Lavarias, Richard Quan, Alma Concepcion, Lara Morena, Natasha Ledesma, Kookoo Gonzales, Gerard Acao, Josh Ivan Morales, Kim Rodriguez, Jovi Vargas, at Quentin Molo. 

Produced  ito ni Ana Abiera del Moral ng MiVida Productions, Inc..