HATAW! D'yaryo ng Bayan hatawtabloid.com
BANGKOK — Muling pinatunayan ni Paris Olympian Aleah Finnegan na siya ang pinakamakinang na bituin sa women’s artistic gymnastics sa ika-33 Southeast Asian Games matapos niyang manguna sa vault apparatus final nitong Huwebes sa Gymnasium 5 ng Thammasat University sa Pathum Thani.
Nakuha ni Finnegan ang kanyang ikalawang ginto sa SEA Games—ang una ay noong 2022 sa Hanoi—matapos magtala ng 13.433, bahagyang dinaig sina Thi Quynh Nhu Nguyen ng Vietnam (13.400) at Kang Xian Yeap ng Malaysia (12.966).
“Napakaespesyal ng gintong ito,” sabi ng 22-anyos. “Marami ang nangyari sa likod ng mga pangyayari, may mga personal na hamon din, pero patuloy ko lang na hinarap ang lahat ng iyon.”
Idinagdag niya na ang kanyang pananampalataya ang nagbigay sa kaniya ng lakas. “Palagi akong nagdarasal kay Jesus. Wala ako kung wala Siya, at alam kong kasama ko Siya.”
Nagkaroon pa ng kaunting kaba bago makumpirma ang panalo. Ilang sandali matapos ang routine ni Finnegan, lumabas ang maling iskor sa screen. Mahigit 30 minuto siyang naghintay bago itinama ng mga hurado ang pagkakamali at opisyal na ideklarang siya ang gold medalist.
“Kinabahan talaga ako nang lumabas ang maling score,” pag-amin ni Finnegan. “Sinusubukan naming intindihin kung paano nila nakuha ang numerong iyon. Nakaka-stress at nakakalito, pero nagpapasalamat ako na naayos din ang lahat.”
Ayon kay Gymnastics Association of the Philippines president Cynthia Carrion, hindi siya nagduda sa resulta. “Pagkatapos ng vault ni Aleah, alam kong ginto iyon. Ipinacheck namin ang score dahil sigurado kaming may miscalculation, at nagpapasalamat akong inayos ito ng organizers.”
Ngayon, nakatuon si Finnegan sa balance beam final sa Biyernes, 2:30 p.m.
Samantala, nakuha ni Haylee Garcia ang pilak sa uneven bars sa iskor na 12.333, habang nagdagdag naman si Justin Ace de Leon ng dalawang bronze sa floor exercise (12.500) at rings (12.700), na nagpasigla sa malakas na kampanya ng Philippine gymnastics team. (POC Media pool/HNT)
