HATAW! D'yaryo ng Bayan hatawtabloid.com
PUNO ng kumpiyansa ang Philippine Aquatics, Inc. (PAI) sa pagpapadala nito ng isang bata ngunit lubos na mahuhusay na pambansang aquatics team sa ika-33 Southeast Asian Games mula Disyembre 9 hanggang 22 sa Bangkok, Thailand.
Sinabi ng PAI Secretary General at swimming legend na si Eric Buhain na ang delegasyon—na binubuo ng mga manlalangoy, divers at mga koponan ng water polo at open water ay kumakatawan sa pinakamalakas na grupo ng mga atleta na natipon ng bansa nitong mga nakaraang taon.
“Walang duda—ito ang pinakamahuhusay nating atleta sa kasalukuyan,” deklarasyon ni Buhain. “Nakuha nila ang kanilang mga puwesto sa pamamagitan ng pinakamahirap na pambansang tryout na naranasan nila, at ginakit nating batayan ang mga oras ng bronze medal winners sa huling SEA Games. Ipinapakita lamang nito kung gaano sila kahanda na makipagkumpitensya sa pinakamalakas sa rehiyon.”
Sa patuloy na suporta mula sa Philippine Sports Commission (PSC) at sa MVP Sports Foundation, ang mga miyembro ng koponan na nakabase sa ibang bansa ay nagpatuloy sa pagsasanay sa Estados Unidos at Canada. Samantala, pinatalas ng mga lokal na manlalangoy ang kanilang porma sa ilalim ng mga pambansang coach na pinamumunuan ni Ramil Ilustre.
Ang mga diver ng bansa ay sumailalim din sa pagsasanay at mga kompetisyon sa China, habang ang koponan ng water polo ng kababaihan ay kasalukuyang nasa Chengdu. Ang koponan ng kalalakihan ay kakabalik lang mula sa isang mahigpit na pagsasanay sa Becej, Serbia, kung saan naglaro sila ng mga exhibition match laban sa ilan sa mga nangungunang koponan sa club ng bansa—salamat sa isang pakikipagtulungan na sinimulan ng Serbian coach na si Filip Stojanovic.
“Ito ay isang batang koponan, ngunit wala silang takot,” sabi ni Stojanovic. “Hindi ko magagarantiya ang isang gintong medalya, ngunit mayroon silang puso na sorpresahin ang sinuman. Anuman ang medalya na kanilang maiuwi, ipinagmamalaki ko sila.”
Personal na pinulong ni Buhain ang mga atleta pagkaraan ng kanilang pagbabalik mula sa Serbia upang tasahin ang kanilang pag-unlad at palakasin ang kanilang moral.
“Palagi kong sinasabi sa kanila: walang pressure, ngunit lumalaban kami para sa ginto,” sabi niya. “Dapat lagi tayong may winning mindset. Tapos na yung panahon na masaya na tayo sa experience lang. Nandyan ang pinakamalakas sa Southeast Asia—if we win here, malaki ang tsansa natin sa Asian Games at pati sa Olympics.”
Higit pa sa SEA Games, ang PAI ay patuloy na umaayuda sa grassroots development at nagpapalakas sa mga coaching program nito sa buong bansa.
Mahigit 100 coaches mula sa mga club, paaralan, at iba’t ibang institusyon ang dumalo kamakailan sa National Coaches Seminar na pinangunahan ng Canadian mentor na si Michal Skrodzki, lead national at open squad coach ng Nunawading Swimming Club.
“Kailangan matibay ang pundasyon,” Buhain stressed. “If our coaches are strong, knowledgeable, and updated, mas maganda ang magiging future ng ating mga young swimmers. Dito talaga nagsimula ang long-term success.”
Sa isang rejuvenated system, mas malalim na talent pool, at isang matapang na pag-iisip, naniniwala si Buhain na ang Pilipinas ay nakahanda para sa isang pambihirang pagganap sa Bangkok. (HNT)
