HATAW! D'yaryo ng Bayan hatawtabloid.com
RATED R
ni Rommel Gonzales
SINABI mismo ni direk Joel Lamangan na ang bago nilang pelikulang Jackstone 5 ay hindi lamang para sa mga bading kundi puwede rin at magugustuhan ng mga tunay na lalaki.
“Siyempre kahit sino mang straight sa lipunang ito, may kaibigang bading.
“Andiyan na nga ang mga bading. Para lalo nilang maintindihan ang bading.
“Para lalo nilang maintindihan kung ano ba itong tinatawag na bading. Anong klaseng hayop ba ito?
“Lalo nilang maintindihan sila kapag napanood nila ito.
“Mapapalapit ba sila roon sa kanilang kaibigan? Baka maging kaibigan pa nila ‘yung mga bading na kilala nila.
“Ako, marami akong kaibigang lalaki. ‘Pag umuwi ako sa Cavite, puro lalaki ang mga kaibigan ko.
“Nakikipare-pare rin siyempre ako. Alam nila!”
Opisyal pa nga siya ng CAT noong estudyante pa siya sa high school.
“Totoong Corps Commander ako noong high school,” bulalas niya.
“Lahat ngayon ng dati kong kadete, alam nila kung ano ako.
“Pare-pare pa rin. Wala namang… hindi tinitingnan ang mababa, hindi tinitingnan ang masama.
“Ang mga bakla, mayroon ‘yang kaibigang lalaki. Kaibigan talaga.
“Hindi ‘ ‘yung kaibigan na tsutsugihin, hindi na dyodyowain. Hindi ‘yung ginagawa ni Arnell,” kuwento pa niya tungkol sa karakter ni Arnell Ignacio sa Jackstone 5 na palabas sa mga sinehan simula bukas, December 3.
Bukod kay direk Joel at Arnell, bida rin sa pelikula sina Gardo Versoza, Jim Pebanco, at Eric Quizon,mula sa APEX Creative Production, Inc., with Dennis Evangelista as line producer.
Ayon pa kay direk Joel, maraming eksena sa pelikula na nag-adlib sila, spontaneous ang marami sa kanilang akting at pag-deliver ng mga dayalog.
Habang nagsu-shoot sila ay ina-adjust ang script para mas mapaganda.
“Script in progress po ‘yun!
“Habang nagsu-shoot, ‘pag kailangang baguhin, binabago. Sapagkat wala naman doon ang writer, ako na lang po ang nagbabago.
“Opo. Script in progress, pero isang bayad lang po ‘yun,” saad pa ni direk Joel na artista at direktor ng pelikula.
