HATAW! D'yaryo ng Bayan hatawtabloid.com
NAG-ORGANISA ang Philippine National Anti-Doping Organization (PHI-NADO) ng Anti-Doping Education Session noong Nobyembre 25 sa Solaire Resort Grand Ballroom and Foyer para sa mga atletang sasabak sa 33rd Southeast Asian Games sa Thailand (Disyembre 9–20) at 13th Asian Youth Para Games sa Dubai (Disyembre 7–14).
Binuksan ang programa ni PSC Chairman John Patrick “Pato” Gregorio na nagbigay ng makahulugang mensahe tungkol sa kahalagahan ng malinis at patas na laban. Sabi niya, ang session na ito ay hindi lamang basta requirement — bahagi ito ng pangakong panindigan ang fair play, integridad, at kahusayan. Paalala niya sa mga atleta: habang naghahanda kayong dalhin ang bandera ng Pilipinas, mahalagang ipakita rin ang dedikasyon sa clean sport, hindi lang para sa inyong career kundi para sa dangal ng bansa. Dagdag pa niya, kahit gaano man kaganda ang panalo, kung hindi sumusunod sa patakaran ng WADA at PHI-NADO, hindi ito kuwalipikadong panalo. “Dapat ang panalo ay malinis, mahusay, at galing sa puso ng bawat atletang Pilipino,” aniya.
Dumalo sa event ang ilang kilalang personalidad tulad ni Michael Barredo ng Philippine Paralympic Committee, dating Olympian Akiko Thomson-Guevarra, at iba pang opisyal ng PSC.
Umabot sa halos 500 ang nakadalo onsite — mga atleta, coach, tagapagsalita, media, at technical staff — at halos 200 naman ang sumali online.
Nagbigay si Dr. Alejandro Pineda, Jr. ng paliwanag tungkol sa tungkulin ng PHI-NADO sa pagsigurong sumusunod ang mga atleta sa international anti-doping rules. May mga lecture din mula sa iba’t ibang eksperto tungkol sa sports medicine, mental toughness, nutrition, at conditioning para mas maging handa ang Team Philippines.
Nagbigay ng hiwalay na briefing ang 33rd SEA Games Deputy Chef de Mission na si Jose Ponciano “Jop” Malonzo para sa mga atletang pupunta sa Thailand. May sarili ring briefing ang mga batang para athletes na pupunta sa Dubai mula kay Milette Bonoan, Chef de Mission ng 13th Asian Youth Para Games.
Sa huling bahagi ng programa, tinalakay ang pinaka-essentials ng Anti-Doping Education — gaya ng rules, responsibilidad ng atleta, at ang listahan ng mga ipinagbabawal na substance sa ilalim ng World Anti-Doping Code 2021.
Nagbigay ng lecture sina Mr. Nathan Vasquez (PHI-NADO Doping Control Officer), Dr. Marion Rivera (TUE Committee Head), at Dr. Anna Lea Enriquez (Committee Member).
Nagtapos ang session sa isang panel discussion na pinamagatang “Clean Sport and Personal Journeys,” kung saan nagbahagi ng kanilang karanasan sina Taekwondo athlete Rodolfo Reyes Jr. at Para Powerlifting athlete Dr. Kat Hernandez — mula sa pagharap sa doping protocols hanggang sa pakikipaglaban sa major international competitions.
Patuloy ang PHI-NADO sa misyon nitong tulungan at gabayan ang mga atletang Pilipino upang maging mas mulat sa anti-doping at mas maitaguyod ang malinis na palakasan sa bansa.
Mabuhay, Team Philippines! Nawa’y magtagumpay tayo hindi lang sa kompetisyon, kundi pati sa pagtatanggol ng ating integridad bilang isang bansa. (PSC MCO/HNT)
Play True. Play Clean. Play Fair!
#CleansportPhilippines #TeamPhilippines #SoutheastAsianGames #SEAGames2025 #AsianYouthParaGames #AYPG2025
