Spain, Colombia magsasagupa sa isang napakahalagang laban

MGA LARONG NGAYON
(PHILSPORTS ARENA)
6 P.M. – CANADA VS THAILAND
8:30 P.M. – SPAIN VS COLOMBIA

MAGSASAGUPA ang Spain at Colombia sa isang napakalaking laban ngayong Martes sa tampok na match ng FIFA Futsal Women’s World Cup Philippines 2025 sa PhilSports Arena. Nakaiskedyul ang laro sa 8:30 p.m., kung saan ang world No. 2 Spaniards at ang eighth-ranked Colombians ay kapwa nais patunayan kung sino ang mangingibabaw sa Group B at makuha ang kalamangan sa paghabol ng puwesto sa knockout rounds.

Parehong tumupad sa inaasahan ang dalawang bigatin at maayos na sinimulan ang kanilang kampanya noong Sabado sa world event na suportado ng Philippine Sports Commission at Philippine Football Federation.

Naungusan ng La Roja ang matinding depensa ng No. 4 Thailand, 5-2, kung saan si Laura Cordoba ay gumawa ng dalawang kahanga-hangang goals sa ika-16 at ika-18 minuto upang basagin ang 2-2 na tabla at pangunahan ang three-time Euro queens tungo sa kanilang pag-arangkada.

Sa panig naman ng Colombians, tinambakan nila ang No. 74 Canada, 2-0, sa tulong nina Angely Camargo (16th) at Nicole Mancilla (30th), habang mahusay na nagbantay si Alisson Olave para sa South Americans.

“Masaya kami sa simula namin at umaasa kaming madadala namin ito sa susunod na laban kontra Colombia,” sabi ni Spain coach Claudia Pons sa wikang Spanish.

Ang Thailand, na runner-up sa AFC Women’s Futsal Asian Cup noong Mayo, at Canada, ang kampeon ng CONCACAF W Futsal, ay parehong maghahanap ng pambawi laban sa isa’t isa sa unang laro sa 6 p.m.

Nasa bansa ang mga pinakamahusay at pinakamahuhusay sa paghabol sa kasaysayan bilang unang Women’s Futsal World Cup champions.

Kabilang sa 16 na kalahok ang host na Philippines, na nakatakdang humarap sa Morocco kagabi sa laban ng mga koponang natalo sa kanilang unang laro sa Group A. (PSC MCO/ HNT)