HATAW! D'yaryo ng Bayan hatawtabloid.com
RATED R
ni Rommel Gonzales
ANG horror film na Near Death ay may tema tungkol sa suicide na kaakibat ng near death experience.
Tungkol din sa depresyon, anxiety at multo ang pelikulang ito ni direk Richard Somes.
Isa sa mga pangunahing artista sa pelikula ay ang mahusay na aktres na si Lotlot de Leon.
Kaya tinanong namin si Lotlot kung sa tunay na buhay ba ay nagkaroon na siya ng mga karanasang may kinalaman sa pelikula?
Lahad niya, “Sa multo, oo. May mga…. oo, mayroon, may experience.
“Pero ‘yung ano, [about suicide], hindi! Lord! Takot ako,” at natawa ang aktres.
“Oo, mumu lang ang na-experience ko.”
Ano ang maibabahagi niya tungkol sa sitwasyon ng pagpapatiwakal na isang nakalulungkot na parte ng komunidad sa kahit na anong bansa?
“I think it’s good that everyone should always look out for others.
“Hindi naman masama na kamustahin ninyo or maybe be a little kinder to everyone you meet.
“Kasi hindi natin din alam kung ano ‘yung mga pinagdaraanan nila.
“So I think that’s also something that they can take out from the film.”
Kasali ang Near Death (na prodyuser din si direk Richard) sa Sine Sindak Film Festival sa mga SM Cinema.
Bida rito si Charlie Dizon na kasama rin sina Xyriel Manabat, Soliman Cruz, at RK Bagatsing.
Produced ng Diamond Productions, CMB Films, at RVS Studios, ang Near Death ay mapapanood sa mga sinehan simula October 29, 2025.
