HATAW! D'yaryo ng Bayan hatawtabloid.com
HARD TALK
ni Pilar Mateo
NASIMULAN na nila ang pagtulong. Una sa mga nasalanta ng pagsabog ng Bulkang Taal noong Pebrero 2020.
Kaya naisagawa ang Tulong Taal: A Musical Collaboration Concert na ginanap sa Cuneta Astrodome.
Ang pilantropong negosyanteng si Dr. Carl E. Balita ang nag-anyaya sa may mahigit 24 na artists sa isang awiting gawa ni Vehnee Saturno, na naging viral sa social media gaya ng YouTube at Spotify.
Nakalikom ng P1.4-M sa mga donasyon ang proyekto na ginamit sa pagbili ng bigas para ipamahagi sa mga nasa evacuation centers na nasalanta.
At narito tayo sa panahon na kabi-kabilaan ang lindol na nararanasan sa Luzon, Visayas hanggang Mindanao.
Muli, kasama si Vehnee at ang mag-asawang Isay Alvarez at Robert Seña, isang fund-raising concert ang muling isasagawa sa Oktubre 28, 2025, 6:00 p.m. sa Fr. Peter Yang SVD Hall sa St. Jude Catholic School, hatid ng Dr. Carl E. Balita Foundation Inc..
Maraming artists muli ang nag-volunteer ng kanilang panahon para maging bahagi ng konsiyerto para sa kapakanan ng ating mga kababayang nilindol, nawalan pamilya, nawalan ng kabuhayan, nawalan ng lakas ng loob sa buhay.
Kabilang sa mga alagad ng sining na magbabahagi ng kanilang talento sa Padayon , Pilipinas (na kantang gjnawa ni Vehnee) sina Alakim, Alynna Velasquez, Bayang Barrios, Beverly Salviejo, Carla Guevara-Laforteza, Chad Borja, Dulce, Frenchie Dy, Jamie Rivera, Jade Aban, Jedidah, Jeminah, Jenine Desiderio, MB40, Ladine Roxas, Ornella Brianna, Rannie Raymundo, Renz Verano, Richard Reynoso, The Fortenors, Vehnee Saturno, Vina Morales at iba pang sorpresang panauhin at virtual performance ni David Pomeranz.
Ipinarinig sa media at ipinapanood ang video ng komposisyon ni Vehnee na naaayon sa panahon ang tema at sa layunin ng palabas for a good cause. Marami ang naantig.
Ang malilikom naman ay ididirekta sa mga pamilyang iginupo ng lindol sa Cebu, sa tulong ng mga Cebuano artist gaya nina Dulce, Chad, at Vina. At tutulong din ang SVD Task Force Linog ng Unibersidad ng San Carlosn sa nasabing bayan, na nagdiriwang ng ika-150 taon ng pagkakatatag ng Society of the Divine Word.
Kabilang sa mga sumusuporta sa nasabing proyekto ang Dr. Carl E. Balita Review Center, Philippine Chamber of Commerce and Industry- Quezon City (PCCI-QC), Tikme Dine, Royal Care, Mekeni, Netplates, Chef’s Bowl of Rice, Happy Life, REHub, UST Alumni Association, Inc. (USTAAI), The Association of Mindoreños, Inc. (TAM), RDLEN’S Printing Services, Manila Times, DZXL558, iFM, at Jobert Sucaldito.
Makaka-ambag ka ng tulong. Inaanyayahan ang mga mag-sponsor ng mga tiket sa halagang P1,500 bawat isa. Ang numerong kokontakin ay: 0917-1037-683 para sa karagdagang katanungan.
Sabi nga nila, “Walang hindi magagawa kung tayo’y sama-sama sa puso, sa diwa, at sa pananampalataya.”
Padayon, Pilipinas!
