HATAW! D'yaryo ng Bayan hatawtabloid.com
BATAY sa mayamang kultura at kasaysayan ng Pilipinas, inilunsad ng Gymnastics Association of the Philippines (GAP) ang opisyal na logo ng 3rd FIG Artistic Gymnastics Junior World Championships, na sumasalamin sa masigla at dinamikong diwa ng pandaigdigang paligsahan, gayundin sa masidhing suporta at pagmamalasakit ng mga Pilipino sa pagsasagawa ng nasabing prestihiyosong kaganapan. Ito ay inihayag ni GAP President Cynthia Carrion.
“Ang gymnastics ay isang masigla at buhay na disiplina, at tayong mga Pilipino ay likas na mainit, masigasig, at pursigido sa anumang ating pinaghuhusayan. Ang mga katangiang ito ang nagsilbing inspirasyon sa paglikha ng opisyal na logo para sa Junior World Championships,” ani Carrion sa opisyal na pagpapakilala ng disenyo.
Kilala ang Pilipinas bilang “Perlas ng Silanganan,” at ang logo ay nilikha na may anyong kabibe—may matingkad na kumbinasyon ng lila, puti, at gintong kulay sa isang translucent na likuran. Sa gitna nito ay ang opisyal na logo ng Fédération Internationale de Gymnastique (FIG) na nagsisilbing perlas ng kabibe.
Ayon kay Carrion, ang kabibe ay simbolikong pagkilala sa Pilipinas bilang kagalang-galang na host ng pandaigdigang paligsahan, at nagpapakita ng isang bansang bukas-palad, ligtas, at sumusuporta sa mga batang atletang nangangarap maging kampeon.
“Pinili namin ang simbolismong ito sapagkat ipinakikita nito na tayo ay isang mayaman, makinang, at maasikasong bansa na binubuo ng mahigit 100 milyong mamamayan,” dagdag niya. “Ito ang pagkakakilanlan na taas-noong ipinagmamalaki ng mga Pilipino.”
Dagdag pa rito, binigyang-diin ni Carrion na ang pagkakalagay ng opisyal na FIG logo sa loob ng kabibe ay sumisimbolo sa pagka-unibersal ng gymnastics bilang isang tanyag at patuloy na tinatangkilik na isport sa Palarong Olimpiko. Sa kasalukuyan, may 161 bansang kasapi na ang FIG.
Ipinahayag din ni Carrion na 77 bansa at 846 na kalahok na ang nakapagpatala para sa nasabing paligsahan na gaganapin mula Nobyembre 20 hanggang 24 sa Grand Ballroom ng Manila Marriott Hotel sa loob ng Newport World Resorts, Pasay City.
Bukod sa pangunahing venue, ipinaalam ni Carrion na maraming alternatibong matutuluyang akomodasyon ang mga delegado dahil sa estratehikong lokasyon ng kumpetisyon. Kabilang sa mga opisyal na hotel partners ang Sheraton Manila, Hilton Manila, Belmont Hotel Manila, Hotel Okura, Savoy Hotel, at Hilton Express, na pawang matatagpuan sa loob ng walking distance mula sa pasilidad ng paligsahan, na nasa gitna ng pangunahing sentro ng libangan, pamimili, at turismo, sa tapat ng NAIA Terminal 3.
Ayon pa kay Carrion, nalampasan na ng Pilipinas ang bilang ng mga kalahok sa nakaraang edisyon ng kumpetisyon, na ginanap sa Antalya, Turkey dalawang taon na ang nakararaan, kung saan mayroong 234 na gymnast mula sa 64 na bansa. “Inaasahan naming madaragdagan pa ito, at kami ay ganap na handa sa kanilang pagdating,” aniya.
Sa itaas ng logo, makikita ang imahe ng isang lalaking gymnast na nasa rings at isang babaeng gymnast na nasa balance beam. Ayon kay Carrion, sila ay kumakatawan sa mga kabataang atleta na maingat na hinuhubog upang maging susunod na henerasyon ng mga natatanging gymnast.
“Ang mga piling atletang ito ay bihira, may angking husay, at puno ng potensyal na handang sumikat sa pandaigdigang entablado. Katulad ng mga perlas na binubuo ng panahon at presyon, ang mga batang gymnast na ito ay bunga ng maraming taon ng dedikasyon, disiplina, at matayog na pangarap,” pagtatapos niya.
Kabilang sa mga pambato ng Pilipinas sina Karl Eldrew Yulo, nakababatang kapatid ng Paris Olympic gold medalist Carlos Edriel Yulo, at si Elisabeth Antone, nagwagi ng bronse sa individual all-around event sa katatapos lamang na Asian Junior Gymnastics Championships sa Jecheon, South Korea. (HNT)
