PSC-UP nagtutulungan para mapabilis ang pagkumpleto ng Davao City-UP Mindanao Sports Complex

NAKIPAGTAMBALAN ang Philippine Sports Commission (PSC) at ang University of the Philippines (UP) upang muling itulak pasulong ang pagtatapos ng 30,000-seater na Davao City-UP Mindanao Sports Complex, matapos ang mga taong pagkaantala simula pa noong 2018. Layunin din ng kasunduan na tiyakin ang patuloy na pangangalaga at pag-unlad ng pasilidad.

Sinuri ni PSC Chairman Pato Gregorio ang pasilidad na inaasahang magiging tahanan ng mga lokal na atletang world-class gaya nina Nesthy Petecio (dalawang beses na Olympic silver medalist), Ernie Gawilan (tatlong beses na Paralympian swimmer), at Sydney Sy-Tancontian (World Sambo ranked no.3). Tampok din sa complex ang isang FIFA-certified na football field, training gym, at aquatics center.

Sa oras na matapos, ang aquatics center ay magkakaroon ng kauna-unahang Olympic-sized pool sa rehiyon. Hindi maikakaila ang pag-usbong ng talento sa paglangoy mula sa Davao City – si Paolo Labanon, isang standout swimmer, ay kinilalang Most Valuable Player sa 2023 Batang Pinoy matapos mag-uwi ng anim na gintong medalya at isang pilak.

Ipinahayag nina UP Mindanao Chancellor Dr. Lyre Anni Murao at UP Office for Athletics and Sports Development (OASD) Director Bo Perasol ang kanilang pananabik sa potensyal ng world-class na pasilidad sa pagbubukas ng mas marami pang oportunidad para sa Davao City sa pandaigdigang entablado. Patunay dito ang pagiging kampeon ng lungsod sa nakaraang BIMP-EAGA Friendship Games sa Puerto Princesa City, sa pamumuno nina Labanon at Philip Sahagun na kapwa nag-uwi ng tiglimang gintong medalya.

Pumasok rin ang UP Mindanao sa isang tripartite agreement kasama ang mga lokal na organisasyon sa sports upang isulong ang mga makabuluhang hakbangin sa sports science, edukasyon, at kaunlaran ng palakasan. (HNT)

#HappyAtletangPinoy

#HAPI