Reig at Salazar, Kampeon sa Sprint Elite ng National Aquathlon Championships

NAMAYAGPAG sina Irienold Reig Jr. at Katrina Salazar sa sprint elite category ng National Aquathlon Championships na ginanap nitong Linggo sa Amoranto Sports Complex sa Quezon City.


Si Reig, na nagtapos sa ikalawang puwesto sa 500-metrong bahagi ng paglangoy, ay humataw sa 2.5-kilometrong takbuhan upang makamit ang kampeonato sa men’s division sa oras na 17 minuto at 11 segundo.


Pumangalawa si Juan Miguel Tayag mula sa Pampanga na may oras na 17:20 upang tanggapin ang medalyang pilak, samantalang si Daniel Cadavos ng Bukidnon ay nagtapos sa ikatlong puwesto na may oras na 17:41 para sa medalyang tanso.


“Magpapatuloy po ako sa masusing pagsasanay at umaasa akong makakamit pa ang mas maraming titulo sa hinaharap,” ani Reig.


Matatandaang nagtapos siya sa ikatlong puwesto sa likod nina Joshua Alexander Ramos at Iñaki Emil Lorbes sa standard elite category ng National Age Group Aquathlon na ginanap sa Cavite noong Marso.


Siya rin ay naging ikalawa kay Matthew Hermosa sa Sun Life 5150 Bohol triathlon noong Hulyo.


Sa women’s division, nakuha ni Katrina Salazar — isang ika-apat na taong mag-aaral ng Dentistry sa University of the East — ang gintong medalya matapos magtala ng oras na 19 minuto at 23 segundo.


“Lubos po akong nasiyahan sa aking naging performance. Isa lamang po itong training race upang masuri ang aking kondisyon,” pahayag ni Salazar, na kagagaling lamang mula sa Asian Triathlon Cup sa Gamagori, Japan noong nakaraang linggo.


Sa junior men’s division, itinanghal na kampeon si Darell Johnson Bada matapos magrehistro ng oras na 16:51. Nakuha naman ni Giro Don Rafael Gito ang pilak sa oras na 17:13, habang si John Micheal Lalimos ay nagtapos ng 17:16 upang tanggapin ang tansong medalya.


Samantala, sa junior women’s division, si Anisha Eunice Caluya ang nagwagi sa oras na 18:53. Si Dhana Victoria Seda-Lomboy ang pumangalawa na may oras na 19:57, at si Qaantreulle Light Wangkay ay nakasungkit ng ikatlong puwesto sa oras na 21:22.

Ipinagkaloob ni Vice Mayor Gian Sotto ng Quezon City ang mga medalya sa mga nagwagi.

“Lubos ang pasasalamat namin sa Triathlon Philippines sa pagbibigay ng ganitong pagkakataon. Salamat din sa pakikipagtulungan ninyo sa pamahalaan upang maisakatuparan ang kaganapang ito,” ani Sotto. (TriPhil)



Quezon City Vice Mayor Gian Sotto ang mga medalya sa mga nanalo sa men at women Sprint Elite category, kina Irienold Reig Jr(Gold), Katrina Salazar (Gold), Juan Miguel Tayag (silver) at Daniel Cadavos (bronze) katuwang ang kinatawan ng Amoranto Sports Complex Administration Office sa ginanap na National Aquathlon Championships nitong Linggo sa Amoranto Sports Complex sa Quezon City. (HENRY TALAN VARGAS)