HATAW! D'yaryo ng Bayan hatawtabloid.com
DINAKIP ng mga tauhan ng Manila Police District (MPD) ang hindi bababa sa 72 indibiduwal na sinabing sangkot sa mararahas na aksiyon sa ginanap na mga kilos protesta laban sa korupsiyon nitong Linggo, 21 Setyembre, sa lungsod ng Maynila.
Iniulat ni MPD chief P/BGen. Arnold Abad kay Manila Mayor Francisco “Isko Moreno” Domagoso na naging marahas ang mga nakamaskarang demonstrador sa Luneta Park, Ayala Bridge, at Chino Roces Bridge sa Mendiola.
Ayon sa ulat, pinagsisipa, itinulak, hinagisan ng mga bato, barikada, bote, at mabahong likidong may halong pintura, ang mga pulis.
Sa 72 nadakip, 51 sa kanila ang dinampot sa Ayala Bridge, kabilang ang dalawang menor de edad na inilipat sa Reception and Action Center (RAC) ng Manila Department of Social Welfare (MDSW), at 11 pang menor de edad na sumasailalim sa pagsusuri.
Nauwi sa kaguluhan ang protesta nang atakehin ng mga demonstrador ang ilang mga establisimiyento.
Naaresto ang 21 iba pa sa Mendiola kabilang ang pitong menor de edad.
Ayon kay Abad, nananatili ang 70 idibiduwal na nadakip sa kustodiya ng MPD sa District Investigation and Detective Management Division (DIDMD) at sa Women and Children Protection Section (WCPS) para sa pagsasampa ng kaukulang kaso tulad ng malicious mischief, paglabag sa Anti-Barricade Act, at iba pang kaugnay na reklamo.
Dagdag niya, katuwang ang MDSW sa pagpoproseso sa mga menor de edad upang matiyak na mabibigyan sila ng kaukulang atensiyon.
Ayon sa hepe ng MPD, sinira ng mga demonstrador ang ilang ari-arian ng gobyerno at ginamit ang mga debris upang makapanakit.
Iniulat rin na ilang indibiduwal ang nagsunog ng isang ten-wheeler trailer truck at isang nakaparadang motorsiklo sa panulukan ng Ayala Boulevard at Romualdez Street.
Ayon sa pulisya, may mga nagprotesta sa Mendiola na naghagis ng mga Molotov bombs kung saan 39 pulis ang nasugatan at nasaktan.
Dahil sa sa sunog, kinailangan ang koordinasyon sa Bureau of Fire Protection (BFP) upang matiyak ang kaligtasan sa lugar.
Mula rito, lumipat ang mga nagpoprotesta sa Mendiola, kung saan naghagis sila ng mga debris at mga Molotov bomb, nasusunog na placard at tarpaulin, at nanira ng mga ari-arian ng gobyerno.
Agad binigyan ng pang-unang lunas ang mga nasugatan sa insidente.
Ani Abad, maaaring may mga madampot pa sa mga indibiduwal na nanira ng isang hotel sa Recto at nagsimula ng sunog.
Sa kabila ng mga pag-aresto, sinabi ng PNP na ‘generally peaceful’ ang isinagawang mga anti-corruption rally sa iba’t ibang bahagi ng bansa.
Naitala ng PNP dakong 6:30 ng gabi ang kabuuang 61,605 indibiduwal na lumahok sa mga kilos protesta — 33,720 sa Metro Manila at 27,885 mula sa ibang mga rehiyon.
