HATAW! D'yaryo ng Bayan hatawtabloid.com
SINALAKAY kahapon sa ikinasang operasyon ng magkakaibang ahensiya ang ika-22 palapag ng Robinsons Equitable Tower sa Pasig City, na kinilala bilang pangunahing sentro ng operasyon ng Creditable Lending Corporation, ang kompanya sa likod ng kontrobersiyal na online lending application na Easy Peso.
Umabot sa 168 empleyado, pawang mga Filipino ang dinakip sa pagpapatupad ng Warrant to Search, Seize, and Examine Computer Data (WSSECD), na inisyu ng Regional Trial Court, National Capital Judicial Region, Branch 46, Manila.
Ang operasyon ay pinangunahan ng National Bureau of Investigation (NBI), (Philippine National Police – Anti-Cybercrime Group (PNP-ACG), at PNP-Criminal Investigation and Detection Group (PNP-CIDG), na may suporta mula sa Presidential Anti-Organized Crime Commission (PAOCC), National Privacy Commission (NPC), at Securities and Exchange Commission (SEC).
Nakompiska ng mga awtoridad ang daan-daang computer at ilang mobile phone na ibinigay ng kompanya na sinabing ginagamit para sa pangha-harass sa panahon ng pangongolekta ng utang, kasama ang daan-daang pre-registered SIM card, text blasters, at mga script para sa pangha-harass.
Ang pagsalakay ay sinundan ng ilang buwang pagmamanman at imbestigasyon, na tinulungan ng testimonya ng isang dating empleyado na nagsalita upang ilantad kung paano niloko at inabuso ng kompanya ang mga nangungutang.
Ang ilang biktima ay inutusan na magpadala ng bayad sa mga personal na GCash o bank account sa ilalim ng panggagaya ng paglilinis ng kanilang mga utang, ngunit muling nakontak ng mga kolektor kahit sila ay nagbayad na.
Ang hakbang na ito ay naganap ilang araw matapos ang isang nakalulungkot na insidente: noong 4 Hulyo, isang lalaki mula sa Valenzuela City ang nagpakamatay matapos makaranas ng patuloy na pangha-harass mula sa mga indibiduwal na konektado sa Easy Peso.
“May isang buhay na nawala dahil sa pang-aabuso ng isang lending app.Hindi utang ang pumatay sa kanya kundi ‘yung walang-awang pangha-harass. To every victim, do not be afraid. You are not alone. Nandito ang gobyerno na handa kayong tulungan,” sabi ni PAOCC Undersecretary Gilberto DC Cruz.
Nirerepaso ng SEC ang legal at regulatory compliance ng kompanya, dahil inabuso ng kanilang operasyon ang sistema habang maling inaangkin ang pagiging lehitimo.
Inihahanda ng mga awtoridad ang dokumento upang magsampa ng mga nararapat na kaso. Haharapin ng mga sangkot ang mga kaso para sa paglabag sa Data Privacy Act of 2012, Truth in Lending Act, at Financial Products and Services Consumer Protection Act, kaugnay ng panlilinlang, panggugulo, at hindi makatuwirang pamamaraan ng paniningil na ipinataw sa mga nanghihiram.
Bahagi ng operasyong ito ang mas malawak na kampanya ng gobyerno upang buwagin ang mga mapagsamantalang Online Lending Applications (OLAs), alinsunod sa direktiba ni Pangulong Ferdinand R. Marcos, Jr., sa ilalim ng pamumuno ni Executive Secretary at PAOCC Chairman Lucas P. Bersamin. (EJ DREW)
